[A:20] mes bskor te lus 'di nyid kyis dmyal bar song ba na/ sangs rgyas la yid ches kyi dad pa skyes te dge bas mtshams sbyar des na mdzod 'grel las/ dge ba chad pa dang / log par nges pa la mu bzhi rtsis nas/ rdzogs byed ni der dge rtsa chad la log par ma nges pa dang / ma skyes dgra ni log par nges pa yin la dge rtsa ma chad pa dang / lhas byin ni gnyis ka dang / 'phags pa rnams ni de gnyis ka min par bshad cing / mtshams med byed pa 'di la min zhes mtshams med byas shing dge rtsa chad pa tshe 'di la dge rtsa mtshams sbyor mi nus par bshad cing dmyal bar skye ba la bar do nges par dgos par bshad mod/ 'dul lung las/ rdzogs byed dmyal bar skyes par bshad pas log par nges pa dang / lhas byin gyi tshe 'di la dge rtsa mtshams sbyar bar bshad cing lus ma spangs par dmyal bar song bar bshad pa ni 'dul mngon gyi mi 'dra ba'i gnad dang / theg chen las/ ma skyes dgra tshe 'di nyid la mthong lam thob par bshad pa sogs ni theg pa'i khyad du nges par mdzod cig/
'o na ston pa'i lha babs kyi dus chen dang / cho 'phrul gyi dus chen lo dang zla ba gang la byung snyam na/ pan chen 'bum phrag gsum pa'i 'dul ba'i spyi don las/ drug pa'i tshes bzhi'i phyi de nas zhag bcu gcig 'das pa gro zhun gyi mar ngo'i tshes gcig nas bzung ste zla ba gsum/ sum cu rtsa gsum du dbyar gnas mdzad/ dbyug pa'i tshes bco lnga la 'dzam bu gling du byon pas lha babs kyi dus chen zhes bya/ de nas zhag brgya dang lnga song ba rta zla'i tshes gcig nas bco lnga'i bar la cho 'phrul gyi dus chen yod par bshad cing / de ltar rgyal ba dkon mchog dpal gyis kyang bshad mod/ kho bo ni cung zhig mi