[A:34] 'di la slob ma thugs sras bzhi/ nye sras gsum/ sras kyi thu bo bzhi sogs yod pa las/ thugs sras bzhi ni/ 'jam dpal zhal mthong shAkya mi tra/ sgrol ma zhal gzigs na ga bo dhi/ sa brgyad non pa Arya de wa/ spyan ras gzigs zhal mthong ma tang gi pa'o/
nye sras gsum po ni/ sangs rgyas bskyangs/ legs ldan 'byed/ slob dpon dpa' bo dang gsum mo/
sras kyi gtso bo bzhi ni/ sngar gyi shAkya bshes gnyen/ 'phags pa lha/ klu'i byang chub gsum gyi steng du zla ba grags pa dang bzhi'o/
gzhan yang rgyal sras zhi ba lha/ sha wa ri dbang phyug/ nag po pa sogs bsam gyis mi khyab pa'ang 'di'i slob ma dngos so/
yang nye gnas gsum ni Arya de wa/ na ga bo dhi/ zhi ba lha gsum yin zer ba'ang 'dug/
'di nyid bsnyen par rdzogs pa'i mkhan po ni/ nA lendra'i mkhan po bram ze sgra gcan zin zhes pa zhig yin par rnam thar dang lo rgyus phal cher las 'byung la/ sgra gcan zin de nyid sa ra ha yin par 'ga' zhig las bshad mod/ grub thob kyi spyi mes sa ra ha chen po zhes pa yongs grags de nyid ni min par sems te/ de nyid slob dpon 'di 'chi bdag 'joms pa'i dkyil 'khor du bcug nas sku tshe sring ba po yin yang / de nyid las mkhan po sgra gcan zin logs su bshad pas so/
bram ze sgra gcan zin gyi mkhan po ni/ sras sgra can zin yin la/ 'di nyid kun dga' bo dang na mnyam yin mod/ sku tshe dgung lo sum brgya