[A:295]de tshul yab rje rin po cher zhus par/ lod rgyu rang med dpal mgon zhal gyi cho 'phrul zhig yin 'dug pas bskang gso gyis phebs pa ltar/ zhal gyi bskang ba gtso bor bton pa'i bskang gso mdzad pa sogs gnas skabs 'di nyid nas bzung rdo rje'i chos srung rnams 'bral med du 'khor ba'i dge mtshan dang / rgyal yum nyid kyang sku khams dngas shing phal cher ting nge 'dzin la 'byams pa dang bcas/ yab rje rin po che nyid dgung grangs sum cu rtsa lngar phebs pa gser 'phyangs zhes pa me bya lo'i hor zla dang po 'gro ba'i bla mas cho 'phrul chen po bstan pa'i yar tshes bcu bzhi res gza' phur bu'i nyin dpal sa skya'i bla brang phun tshogs gling du ngo mtshar ba'i ltas du ma dang bcas te bltams par/ sku dbyibs mdzes shing zhal mdangs gsal ba sogs lus can mtha' dag yid 'phrog pa'i ngo mtshar du bzhugs/ gsung mkhyen tsam na lan cig yum gyis na bza'i sbug tu mnal bas 'od gsal gyis gzigs mor/ gzhan gyi lus ngag gi bya ba thams cad mngon sum ltar gsan gzigs byung ba mnal sad tshe gzhan la gsungs pas kun ya mtshan pa byung / 'di nas bzung ste chos thams cad bden med sgyu mar mkhyen pa'i ye shes kyang thugs rgyud du 'bad pa med pa 'khrungs/