[B:8a]zhes bya ste/ bod skad du klu'i dbang po bsrung ba'o/ /kha cag 'di khong rang gi zhang po las rab tu byung zhes zer ba ni/ sad mir 'dod pa dang 'gal zhing mtshan gyis kyang mkhan chen gyi sdom drug tu gsal lo/ /des na mkhan chen dang zhang po las chos mang du bslabs/ lo tsA legs par mkhyen/ slob dpon chen po padma la yang gdam ngag nod/ yer pa'i brag la sgrub pa mdzad pas grub pa thob/ mkhas grub kyi grags pa cher byung bas 'khon chos kyis che ba'i thog ma yin no/ /
[A:16]gcung rdo rje rin po ches kyang slob dpon padma la gsang sngags rnying ma'i chos mang du gsan zhing bslabs/ grub pa yang ci rigs pa thob/ mtshan grags thon/ 'dis yab yul tu 'bro dgra 'dul gyi bu mo 'bro bza' g.yang lon skyid khab tu bzhes pa la sras bdun byung zhing / zhang po de bod kyi gyad pa'i brgyud yin pas zhang rigs kyi sku rtsal shin tu che bar byung / de'i tshe 'bro gnyan rtser ltad mo nyi ma gsum byung ba la/ sku mched bdun pos rta dang lus chas nyin re bzhin 'dra 'dra spos nas rta rgyugs| tshabs 'gran pas khrom thog chod pa byung ba na/ zhang po la 'bras 'dzugs par go nas zhang pos dmag bsags/ 'thab mo byed zer byung ba la/ gcig par zhang po yin/ gnyis par khyim mtshes yun ring 'grogs nas/ rgyal khams yangs po la dge 'tsher byed don med zer nas che ba mnga' ris mang yul/ de 'og mnga' ris gung thang / de 'og srad/ de 'og nyang shab tu byon te/ yul so sor bzung bas de rnams las gyes pa'i 'khon tsho mang du 'phel te grags can ma byung | chung bas pha yul rang du bzhugs/ 'bro dang 'khrug pa yang spyad