[A:82a]'gos gnyis kyi brgyud rim dang phal cher 'dra ba yin no/ /gnyis pa gsar ma'i brgyud rim bstan pa'i sgo nas lugs de ji ltar dar ba'i tshul ni/ kha che'i paNDa ིta chen po shAkya shrI bha dra bod du byon pa'i legs lam la brten nas byung ba yin te/ de yang spyir paN chen 'di kha che khri brtan gyi bye brag dza shwa dha ra zhes par shing mo glang gi lo bltams/ dgung lo bcu pa la bram ze lakShindha ra la sgra rig pa gsan/ lo dgu pa la dge bsnyen bsgrubs nas nyer gnyis kyi bar du tshangs spyod kyi dge bsnyen mdzad/ nyer gsum pa la mkhan po su kha shrI bha dra ste bde ba dpal bzang po la rab byung zhus nas nyer dgu'i bar du kha cher bzhugs shing / sum cu pa la yul dbus ma ga dhAr byon te mkhan po shanta ka ra gupta zhi ba'i 'byung gnas sbas pa dang / da sha bha la dang / gsang ston dha bar sogs dge slong bco brgyad las bsnyen par rdzogs pa mdzad nas 'phags yul nyid du sbyangs pa cher mdzad pas/ mdo sngags rig gnas dang bcas pa sogs shes bya thams cad la mkhas pa'i pha rol tu son te/ rgyal ba'i bstan pa ches cher gsal bar mdzad pa'i rigs nas dgung lo drug cu bzhes pa'i dus khro phu lo tsA ba byams pa'i dpal dgung lo so gsum lon pa'i tshe/ paN chen 'di bod du spyan 'dren par byon te rgya gar bairYa'i tshong dus su phebs pas/ ba ne shA ra bya bar paN chen dang mjal ba na/ paN chen gyi gsung gis/ lo tsA ba 'di chos mang du shes pa lha chen bzhengs pa'i stobs yod pa'i yar rgan zhig yod bsam pa la na tshod gzhon nur 'dug chos bsgyur ba'i lo tsA yang mi phod/ sgrub thabs 'ga' byin la 'o skol dpon slob phyir bzlog gsungs/