[A:34a]dang ni/ /dngos po med pa'i don de rig /gang tshe lus de bor ba na/ /bde ba can du skye bar 'gyur/ /de ni mthar gyis sangs rgyas nyid/ /nges pa kho nar yang dag thob/ /ces dang / lang kar gshegs pa las/ lho phyogs bai ta'i yul na ni/ /dge slong dpal ldan cher grags pa/ /de ming klu zhes 'bod pa ste/ /yod dang med pa'i phyogs 'jig pa/ /nga yi theg pa 'jig rten du/ /bla med theg chen rab bshad nas/ /rab tu dga' ba'i sa bsgrub ste/ /bde ba can du de 'gro'o/ /zhes dang / 'phags pa sprin chen po stong phrag bcu gnyis pa las kyang / kun dga' bo li tsa bI gzhon nu sems can thams cad kyis mthong na dga' ba zhes bya ba 'di ni/ nga mya ngan las 'das nas lo bzhi brgya lon pa na klu zhes bya ba'i dge slong du gyur nas nga'i bstan pa rgyas par rab tu bstan te mthar gyis dang ba'i 'od ces bya ba'i 'jig rten gyi khams su de bzhin gshegs pa ye shes 'byung gnas 'od ces bya bar 'gyur ro zhes dang / dus kyi 'khor lo'i rgyud phyi ma las/ dge slong slob dpon klu sgrub ces bya ma lus yon tan 'byung khungs sems can kun la phan 'dogs pa/ /zhes pa la sogs gsungs pa yin no/ /de ltar rgyal bas lung bstan pa'i skyes bu chen po des bka'i dgongs pa rang dbang du 'grel ba'i sgo nas bstan bcos kyang / bden gnyis zung 'jug dang gzhi lam 'bras gsum gyi gnad bshad de/ theg chen dbu ma'i don rgya cher bstan pa la sku gsum la bstod pa la sogs pa bstod pa'i tshogs/ don dam rten 'brel stong nyid kyi gnad bshad de yod