[A:2b]pa yin te/ ji skad du/ dang por zab gsal gnyis med 'jam pa'i dbyangs/ /bar du rigs ldan 'jam dbyangs grags pa'i zhabs/ /tha mar gnas lnga rig pa sa skya pa/ /bdag nyid chen po'i sngon gyi skyes rabs yin/ /zhes pa ltar dang po bde bar gshegs pa thams cad kyi mkhyen rab thams cad gcig tu bsdus pa'i ngo bo 'phags pa 'jam dpal/ bar du rigs ldan gyi sa skyong chen po mi'i dbang po 'jam dpal grags pa/ tha mar gnas lnga rig pa'i paNDi ta chen po kun dga' rgyal mtshan dpal bzang po zhes bya ba rnams su sku'i rnam 'phrul brgyud mar bzhes nas/ slar yang gangs ri'i khrod kyi gdul bya skal ldan rnams kyi smon lam dang legs byas kyis bskul nas/ dbus 'gyur gyi tshal rdo rje'i gdan nas byang phyogs su dpag tshad brgya tsam bgrod pa'i sa'i cha/ yon tan rin po che du ma'i 'byung khung / 'phags pa'i gang zag rnams kyi bsti gnas 'gran zla med pa'i mkhas pa rgyun mi chad par 'byon pa'i mtshan ma dang ldan pa'i gtsang grom pa la stod dpal ldan sa skya zhes grags pa'i dgon pa nas dbang po'i phyogs su ha cang mi ring ba zhig bgrod pa'i nor 'dzin gyi mthil/ phyi nang gi dpal 'byor du ma 'byung ba'i bsti gnas dpal rtse gdong gi phun tshogs gling zhes pa'i khang bzang chen po der/ phun tshogs gnas dang skyon med rigs bzang dang / /kha na ma tho med pa'i yab dang yum/ /skal bar ldan pa'i 'khor tshogs la dgongs