[A:5a]sogs pa sngon gyi bag chags sad pa'am/ ma 'ongs pa'i mdzad pa lung ston pa'i rnam pa ngo mtshar ba'i spyod pa 'ba' zhig mdzad do/ /
gzhan la phan bde bskrun pa'i byed po khyod/ /
yum gyi ge sar rtse mor 'khrungs pa'i tshe/ /
tshad med rnam bzhi'i zhal gyi 'dzum dkar des/ /
'gro kun tshangs pa'i bde la rab tu sbyar/ /
sngags skyes dpa' bo'i dbang phyug gang gi mtshan/ /
rigs dang rjes su mthun par yab kyis [C:263]gsol/ /
tshangs dbyangs gsung gi dang por bla ma zhes/ /
snyan 'jebs ngo mtshar gtam 'di phyogs bcur bsgrags/ /
byis pa'i ngang tshul rtsed mo la spyod kyang / /
sngon dang phyi ma'i rnam thar 'di yin zhes/ /
rang gi mdzad bzang mtshon pa'i brda ston pa/ /
'di las ngo mtshar gnas su gyur pa su/ /
gzhan yang byams pa dang snying rjes thugs rgyud gtams pa'i dbang las/ ngan long dang sprang po'i tshogs gzigs ma thag snying rje'i spu long rab tu g.yo ba'i zhal ras kyi mdangs 'gyur ba sogs sku'i rnam 'gyur las kyang yang dag pa'i rigs sad par rjes su dpag par nus la/ sku skye ba dpag tu med pa nas sbyin pa la goms pa phul du byung ba'i rnam 'gyur/ [B:15] na bza' dang phyags la sogs pa sku'i rim gro pas bzlog kyang mi gsan par sprang po sogs 'phongs pa rnams la 'phangs pa med par gnang / na bza' gcig las ma bzhes pa'i skabs la lar/ mdun bsham 'og ma dang cha ga'i nang dang mgul gong gi nang sogs bregs nas gnang ba/ yab yum gyis gya tshoms kyi spyod pa las bzlog pa'i thabs su na bza' gsar pa bzhes pa bkag kyang / hrul po bzhes pa la ngal ba'i