[A:138]chos sku rang la yod kyang ma shes pas/ /thag khra sbrul du 'khrul ltar bdag 'dzin gyis/ /bcings pa'i 'gro la bzod med snying rje bsgom/ /de ltar rang gi dge ba ci bsags pa/ /sems can don du byang chub sar bsngos la/ /spyod lam thams cad sgyu ma rmi lam ltar/ /dran pas bstan 'gro'i don mang ci nus bsgrub/ /mdor na dus rnams kun tu ma brtags pa'i/ /spyod pa spangs nas brtson ldan dran shes dang / /bag yod blo yis thabs shes zung 'brel gyi/ /lam 'di bsgrubs na byang chub myur thob 'gyur/ /da dung gces pa'i gdams ngag cung zad bshad/ /chags pa skye ba'i yul la zhen pa spangs/ /zhe sdang skye ba'i yul la byams pa sgoms/ /gti mug skye ba'i yul la rtog dpyod thongs/ /nad dang sdug bsngal gang byung lam du khyer/ /gdon bgegs lhar sgoms de la dngos grub longs/ /de tsam ma nus phan sems snying rje skyed/ /mi rtag dran pas yang yang lcag gis skul/ /phyi rol snang ba'i yul la zhen pa thongs/ /nang du rang sems 'dzin pa'i rtsa ba chod/ /bar du rnam smin lus kyi gces 'dzin bshig /srid pa hrul por gtong ba'i thabs mchog lags/ /skyes chen dam pa rnams kyi bka' drin las/ /zab rgyas chos tshul mnos pa'i snying po'i don/ /nyams su len tshul mdo rgyud dgongs pa bzhin/ /bshad pa 'di la dpyod ldan kun dges mdzod/ /khungs dang 'brel ba'i zab chos mtha' yas pa/ /thos tshul bstan bcos rta ljang 'di shar bas/ /dam chos rin chen gter mang gsal mthong phyir/ /zab rgyas chos kun gsal ba'i nyin byed