[A:71a]mo'i lung sbyor gyi/ /tshig des lus dkyil sa bon las/ /bskyed par grub na bhru~M a~M sogs/ /rtsa rgyud nas bshad yig lnga las/ /lus dkyil lha rnams bskyed par rigs/ /lus dkyil sa bon bhru~M a~M sogs/ /yin zhes bsgrubs nas lha bskyed tshe/ /de dag min pa'i ha~M sogs las/ /bskyed par 'gal ba ltag sprod yin/ /gal te bhru~M a~M la sogs pa'i/ /sa bon nyid las bskyed do zhes/ /'dod na gzhung bshad thams cad las/ /tsaNDa lI dang mthun pa yi/ /yig 'bru rnams las bskyed pa'i tshul/ /gsal bar bshad pa gzhung bshad la/ /mkhas par rlom pa khyed kyis bkag /sa chen 'gag pa'i sa skya pa'i/ /gzhung bshad mkhas rlom de re blun/ /gzhan du 'di kha byung mod kyang / /skabs 'dir lus la grub zin zhig /lhar bsgom pa las 'dam kha med/ /yang na 'gal la ma 'khrul ba'i/ /tshad ma khas len byed dam ci/ /kho bo cag ni lung de'i don/ /rig pa'i dbang lnga'i rigs lnga po/ /pho brang gtso bor gnas gyur tshe/ /bhru~M a~M sogs las bskyed pa dang / /lus dkyil bsgom tshe ha~M sogs las/ /bskyed pa gnyis ka tshig nyung ngu'i/ /bstan par 'dod kyi cig shos min/ /dang po'i las can gang zag gi /lus dkyil lha rnams sa bon las/ /gsar du bskyed pa ma yin par/ /gdod nas grub par go ba'i phyir/ /ngag 'don tshe na de mdzad kyi/ /las zhes bya ba'i tshig de dag /nor pa yin pa su zhig smra/ /de yi phyir skabs ma longs par/ /tshig tsam rtsod pa'i ngal ba de/ /byis pa rnams kyi khyad nor yin/