[A:༡༢༡]ལྷ་ལ་མཆོད་པ་ཕུལ། ལྷག་མ་ཆུ་ལ་བླུག་ནས། རིགས་བརྒྱུད་ཁྱད་འཕགས་འབྱུང་བའི་སྨོན་ལམ་བཏབ་པས་མང་ལྡོམ་མཉེས། དུས་དེར་ནམ་མཁའ་ནས། སྤྲུལ་པའི་ལྷ་བརྒྱུད་སྤེལ་རན་པས༎ ་སང་ཕོད་དུས་ཀྱི་ད་ཙམ་ན། ། རིགས་ཀྱི་སྲས་བུ་འཁྲུང་བར་འགྱུར། ། ཟེར་བའི་སྒྲ་བྱུང་བ་དང་། མང་ལྡོམ་གྱིས་སྨན་བཙུན་གྱི་རྩར་བྱོན་ནས་གཟིམས། ཐོ་རངས་མི་དཀར་རྟ་དཀར་དུ་སྤྲུལ་ནས། མཆེད་བདུན་ལ་གསུང་བ་བཞིན་བྱས་ཡོད། སྲས་ཇི་ལྟར་འཁྲུངས་ཞུས་པའི་ལན་དུ། མི་བརྒྱུད་ལྷ་རབས་གསུམ་དུ་ཡོང་། ། གཅིག་གིས་བླ་མའི་བརྒྱུད་པ་འཛིན། ། སེམས་ཅན་ཀུན་གྱི་འདྲེན་པ་བྱེད། ། གཅིག་གིས་བོད་ཁམས་དཔོན་དུ་འགྱུར། ། བོད་ཁམས་ཀུན་གྱི་རྗེ་བྱེད་ཅིང་། ། གཅིག་གིས་དཔའ་བའི་རིགས་སུ་ཡོང་། ། ཞེས་གསུང་། དེ་ནས་ཟླ་བ་བདུན་རྫོགས་དུས། ཉམས་སད་པའི་ཕྱིར་དུ་བདག་གི་སྲས་མ་ལགས་ཞེས་ལྷ་མོ་ལ་གསུངས་པས། སྲས་འཁྲུངས་ཁར་སྨན་བཙུན་གྱིས་སྔར་གཟིམས་སར་བྱོན། མནལ་ལམ་དུ་གསེར་གྱི་མཆོད་རྟེན་རིན་པོ་ཆེས་སྤྲས་པ་ལ། བང་རིམ་གྲངས་མེད་ཅིང་ཐོག་མཐའ་བར་གསུམ་ལ་རིམ་བཞིན་བླ་མ། ལྷའི་བུ་བུ་མོ་བསྒྲིགས་པ་ཞིག་པང་དུ་བྱུང་བ་རྨིས། སང་སྲས་འཁྲུངས་པ་ལྷ་རིའི་རྩེར་ཁྱེར་ཏེ། གཡམ་སྒྲོམ་གྱི་ནང་དུ་སྲས་བཞག་ནས། མང་ལྡོམ་གྱི་སྲས་ཡིན་ན་མི་བརྒྱུད་ལྷ་ལས་སྲ་བ་དང་། མིན་ན་བྱ་དང་གཅན་གཟན་གྱིས་ཟ་བའི་སྨོན་ལམ་བཏབ། མིའི་དྲི་མ་ཕོག་པའི་སྟབས་ཀྱིས་ལྷ་གནས་སུ་མ་ཐོན་པར་ཡུལ་དུ་ལོག་དེར་མང་ལྡོམ་ལ་རྒྱུ་མཚན་རྣམས་བཤད་པས། དེ་མ་ཐག་ཡབ་ཡུམ་གཉིས་ཀྱིས་ལྷ་རིའི་རྩེར་ཕྱིན་པ་ན། ཁྱེའུ་གཡུའི་ཟུར་ཕུད་ཅན་སྤྱི་གཙུག་ན་རླང་པ་དཀར་པོ་ཡོད་པ་གཅིག་ལ་གཡུ་འབྲུག་གིས་ངར་ཆུ་བླུད། སེང་གེས་ནུ་ཞོ་བསྣུན། རྒོད་ཀྱིས་གཤོག་པས་བཀབ། གཅན་གཟན་རི་དྭགས་ཀྱིས་སྐོར་བ་བྱེད། འཇའ་ཚོན་གྱི་གུར་ཕུབ་འདུག་པ་གཟིགས་པས། ཡབ་དགྱེས་ཏེ། རླངས་སོ་རླངས་སོ༎ ་ལན་གསུམ་རླངས། གསུངས་པས་