[A:༡༧]སྐད་དོ། ། དེ་ནས་སྲས་ཀྱིས་ཡབ་ཀྱི་གསུང་བཞིན་བྱས་པས་མིག་ཕྱེ་སྟེ། སྐྱིད་ཤོད་སྟག་མོ་རི་ལ་གཉན་འདུག་པ་གཟིགས་པས་སྟག་རི་གཉན་གཟིགས་སུ་གྲགས། བང་སོ་དོན་མཁར་མདའ་རུ་བརྩིགས་སོ། ། རྗེ་དེ་དང་འོལ་གོང་བཟའ་སྟོང་བཙུན་འགྲོ་དཀར་གྱི་སྲས་གནམ་རི་སྲོང་བཙན་ཏེ་འདིའི་རིང་ལ་རྒྱ་ནས་རྩིས་དང་སྨན་བྱུང་ཞིང་། བ་དམར་མོའི་འོ་མས་སྦྲུས་པའི་འཇིམ་པ་ལས་བརྩིགས་པའི་ཕོ་བྲང་ཁྲི་བརྩེགས་འབུམ་གདུགས་ཞེས་བྱ་བ་བརྩིགས། བྲག་གསུམ་ལྡིང་མའི་མཚོ་འགྲམ་ནས་རྟ་མདོ་ཝ་ཅང་ཤེས་བརྙེད་པར་ཆིབས་ནས། ཕུང་གཡག་ཐལ་དཀར་རུ་རིང་ཞེས་བྱ་བའི་འབྲོང་བསད་པའི་ཤ་སྒ་ལ་བཏགས་པ་ས་ལ་ལྷུངས་པ་ལས་ཚྭ་རྙེད། བང་སོ་དོན་མཁར་མདར་བརྩིགས་པ་ཡིན་ནོ༎ སྨྲས་པ།
གསངས་བའི་མཛོད་འཛིན་རྒྱལ་སྲས་མཆོག་གི་ལེགས་པར་བྱས་པའི་གྲུ་གཟིངས་ཀྱིས༎
ཐབས་མཁས་འཕྲུལ་གྱི་སྒོ་འཕར་ལས་འོངས་གཉན་པོ་གསང་བའི་ཡིད་བཞིན་གྱི༎
ནོར་བུ་དབང་རྒྱལ་བོད་འབངས་ཡོངས་ཀྱི་རྒྱལ་མཚན་རྩེ་མོར་ལེགས་འགོད་པའི༎
སྐལ་བ་མཆོག་གི་དབྱངས་སུ་ལེན་འདི་དྲི་ཟའི་རྒྱུད་ལ་རྣམ་པར་འཁུ༎
། དེ་ལྟར་དམ་པའི་ཆོས་ཀྱི་འཆི་མེད་བདག་པོའི་བ་གམ་མངོན་པར་མཐོ་བ་དག་གི་སྒོ་གླེགས་གྲངས་མེད་དུས་གཅིག་ཏུ་ཕྱེ་བའི་སྲོལ་གྱིས་དགེ་ལེགས་