[A:292] /chos kyi grags pa la sogs pa'i rnam par rol pa du mas lta ba ngan pa la mngon par zhen pa'i mu stegs mtha' dag gi grub pa'i mtha' thams cad sun phyung nas/ yang dag pa'i lta ba la btsud cing sa'i steng phal cher ngur smrig 'dzin pas khyab par mdzad de/ 'phags pa'i yul du rgyal ba'i bstan pa ches cher dar bar mdzad do/ /de nas ring zhig nas de bzhin gshegs pas byin gyis brlabs shing lung bstan pa/ kha ba can gyi ljongs/ gangs ri dpal dang ldan pas bskor ba/ chu gtsang zhing bsil ba'i rgyun du ma 'bab pas nye bar brgyan pa/ 'jig rten dbang phyug gis byin gyis brlabs pas skye dgu rnams kyang rang bzhin gyis snying rje che zhing / sems rgya chen po la mos pa 'byung ba bod kyi yul 'di ni sprul pa'i rgyal blon rnams kyis lnga rig pa'i paNDi ta du ma dang / grub pa'i skyes bu du ma spyan drangs te dam pa'i chos dbu brnyes/ srol btod/ dar zhing rgyas par mdzad de/ lung dang rigs par smra ba dang / legs par sbyar ba'i skad kyis dam pa'i chos kyi tshig don legs par 'byed pa'i dge ba'i bshes gnyen yang mang du byung ba las/ khyad par du yang sad mi mi bdun zhes bya ba'i lo tsA ba rmad du byung ba byung zhing / de dag gi nang nas kyang shin tu mkhas par grags pa/ 'khon klu'i dbang po srung ba legs zhes bya ba byung la/ skyes bu dam pa des dam pa'i chos mang du bsgyur zhing rgyal ba'i bstan pa gsal bar mdzad do/ /de nas bzung ste deng sang gi bar du sprul pa'i gdung brgyud rim par byon pa rnams kyang / mngon par shes pa dang / rdzu 'phrul gyis rnam par rtsen pa la sogs pa so so'i yon tan du ma dang ldan zhing dam pa'i chos kyi tshul chen po bzung nas sems can gyi don dang / bstan pa'i bya ba rgya chen po mdzad pa'i tshul yang / de dag gi rnam par thar pa las 'byung la/ khyad par du gtsang gi sa cha/ sa gzhi kha ba dang / dung dang kunda'i