[A:293]mdangs ltar kun nas dkar zhing gsal ba'i mtshan ma bzang po dang / rin po che'i 'byung khungs du mas brgyan pa/ chu klung dri ma med pa g.yas nas dal bus 'bab pa/ grub pa'i skyes bu dang / mkhas pa'i skyes bu du mas nye bar bsten pa/ skye dgu rnams kyang rang bzhin gyis shes rab che zhing 'byor pa'i mtshan ma du mas nye bar brgyan pa/ yid bzhin gyi mtsho ltar ngur smrig 'dzin pa'i ngang pa'i tshogs kyis kun nas gang ba/ ma ga dha rdo rje'i gdan ltar mkhas pa'i skyes bu dam pa du ma 'byung ba'i gnas/ dpal ldan sa skya zhes snyan pa'i grags pas phyogs kyi tha grur rgyas par khyab pa'i chos kyi grwa chen po 'dir/ theg pa chen po'i chu gter 'dzin pa dge ba'i bshes gnyen dkon mchog rgyal po zhes bya ba byung ngo / /de'i sras ni sa skya pa chen po zhes grags te/ de yang gzhon nu nyid nas yon tan phun sum tshogs pa dang ldan zhing dgung lo bcu gnyis bzhes pa'i tshe rje btsun 'jam pa'i dbyangs la sogs pa yi dam du mas zhal gzigs shing / mngon par shes pa dang ldan pas sku'i bkod pa du mar sprul nas sems can gyi don mdzad pa dang / chos kyi mnga' bdag chen por gyur nas bstan pa'i bya ba ji ltar mdzad pa la sogs pa yang de nyid kyi rnam par thar pa las 'byung ngo / /de'i sras kyi thu bo ni rin po che bsod nams rtse mo zhes bya ba yin la/ skyes bu dam pa 'di ni/ rang bzhin gyis dul ba dang / sdom pa dang / tshangs par spyod pa dang / dam pa'i chos nyan pa la dga' zhing spro bas gzhung lugs du ma'i pha rol tu son yang / mang du thos pa la ngom pa med pas gdan sa yang gcung la gtad nas/ /bdag nyid thos pa dang / gzhan gyi don la brtson pas gshegs par gyur to/ /de'i gcung ni rje btsun grags pa rgyal mtshan zhes bya ba yin te gzhon nu nyid nas rig pa 'dzin pa'i sde snod mtha' dag khong du chud cing / dgung lo bcu gnyis