[A:344]brtul zhugs la gnas nas nyi ma snga phyed yan la sha chang gi rnam pa kun mi bsten/ mar zho ja bzang po bag re gsol mod/ lar 'dod yon gang la yang zhen pa med pa cig bzhugs/ sku mtshams ma mdzad dus na'ang dgongs ja'i dus nas sang gdan ma ran gyi bar gzims khang du bzhugs nas mjal kha med/ byang chub sems dpa'i bslab pa la dbu ma lugs kyi sems bskyed chen mo chos rje sa skya pas mdzad pa phyag len dang bcas pa ji lta ba bzhin yang yang zhus/
thugs nyams su bzhes shing gzhan la'ang 'bogs pa la/
khyad par du blo sbyong mthar thug pa bdag gzhan brje ba la dang po nas phul du phyin pas sems dpa' chen por the tshom med do/ /gsang sngags kyi sdom pa ni/ dam tshig nyi shu rgyu tshogs dang bcas pa la ma rmongs/ rdo rje 'chang nyid yin par mkhas grub kyi skye bo mang pos mngon du gyur pas bdag gis smos ci 'tshal/ dam pa 'di'i nang gi mngon par rtogs pa'i cha ni/ gzhan gyi snang ngo la dngos su ci yang mi mkhyen pa'i tshul mdzad mod/ sgom pa slob ma'i blo la bog 'don pa/ gegs sel ba/ thugs mnyam par ma bzhag pa lta bu shugs byung du gsung drag po 'byon pa/ bka' bkyon gyi tshul du thol byung du gsungs pa lta bu la yang yang brtags pas gdul bya'i rgyud tshod/ ma 'ongs pa'i dge legs bstan pa la phan thogs 'ong mi 'ong thogs pa med par mkhyen pa nges pa yang yang thob pas bdag rang gi blo ngo na tha mal pa ma yin/ rdo rje 'chang nyid yin pa'i nges pa yang yod cing / rdo rje 'chang nyid kyi mdzad pa yang mdzad par snang ngo / /byin rlabs kyi phul shin tu che ba/ ye shes 'bebs pa la yang Da dril re dang sngags bzlas pa tsam la/ thams cad sa 'phag gnam 'phag gi 'phar g.yo chen po tshad med pa dang / byin rlabs kyang gdon gyis nyen pa la phyag reg pa tsam mam/ dri chen dri chu tsam gyis thon par 'ong bar 'dug go /dgung lo dgu bcu go drug pa la yang bgres pa'i rnam pa med/ ldang