[A:52b]zhes lam gyi bden pa'i 'khor du bshad la / bsdu bar yang / 'jig rten pa'i chos gang dag yang 'byung ba'i srid pa sun 'byin cing / de la mi phyogs pa / 'jig rten las 'das pa'i lam skyed par byed pa de dag ci'i phyir kun 'byung ba'i bden pas bsdus pa yin zhe na / de dag ni ngo bo nyid kyis yang 'byung ba'i srid pa la mi phyogs pa yin mod kyi / 'on kyang yang 'byung ba'i lus dang ngag dang yid kyis legs par spyad pa dang rjes su mthun pa yin pas de'i phyir de dag kyang kun 'byung ba'i bden pas bsdus pa yin par rig par bya'o / /
zhes so / /
tshogs sbyor gyi rang ldog zag med yin la / /
lam bden mtshan nyid pa'o zhe na / de mi 'thad de bsdu bar / thos pa dang bsam pa las byung ba'i shes rab kyis dran pa nye bar gzhag pa dag la brtson par byed pa de / de yang kun rdzob shes pa dge ba zag pa dang bcas pa yin no / /
de de la brten nas nges par 'byed pa'i cha dang mthun pa'i sbyor ba bsgoms pa las byung ba'i dran pa nye bar gzhag pa de dag la brtson par byed de / de yang kun rdzob shes pa dge ba zag pa dang bcas pa yin no / /
de de la brten nas mthong ba'i lam gyi sbyor ba nges par 'byed pa'i cha dang mthun pa dang ldan pa'i dran pa nye bar gzhag pa de dag la brtson par byed de / [C:71]de yang kun rdzob shes pa dge ba zag pa dang bcas pa yin no / /
de de la brten nas mthong ba'i lam gyi bar chad med pa'i lam gyis bsdus pa 'jig rten pa'i chos kyi mchog skyed par byed de / de yang [B:47b]kun rdzob shes pa dge ba zag pa dang bcas pa yin no / /
zhes de dag zag bcas su bshad do / /
bcu pa bslab pa gsum du phye na / lhag pa'i tshul khrims / lhag pa'i sems dang lhag pa'i shes rab kyi bslab pa'i / /
rgyan las kyang bslab gsum dbang du mdzad