[A:54b]skyed byas ma [B:49a]thag grangs med rtsom pa la ma zhugs te / ji skad du / dkon mchog sprin las / rigs kyi bu de bzhin gshegs pa ni bskal pa grangs med pa du mas yang dag par grub ba yin te / rigs kyi bu de bzhin gshegs pa ni dpag pa dang / bsam pa dang / brtag bar mi nus so / /
byang chub sems dpa' sgrib pa thams cad rnam par sel bas gsol pa / bcom ldan 'das bskal pa grang sa ma mchis pa gsum gyis de bzhin gshags pa rnams yang dag par 'grub pa ma lags sam / bcom ldan 'das kyis bka' stsal pa / rigs kyi bu ci'i phyir zhe na / byang chub sems dpa' de bzhin gshegs pa'i yul bsgrub par bya ba ni bsam gyis mi khyab ste / de ni bskal pa grangs med pa gsum gyis yang dag par bsgrub par mi nus kyi / nam byang chub sems dpa' chos mnyam pa nyid du zhugs par gyur pa de'i tshe nas brtsams te / bskal pa bgrang bar bya yis / thog ma'i sems nas brtsams te ni ma yin no / /
zhes gsungs so / /
des na theg bsdus las / bzang dang smon pa'i stobs can dang / /
sems brtan khyad par 'gro pa yis / /
byang chub sems dpa' grangs med gsum / /
kun tu rtsom par mdzad pa yin / /
zhes pa'i 'grel par / bzang po ni dge ba ste de stobs dang ldan par gyur pa ni bzang po'i stobs can te / de de la de yod pas smon lam gyi stobs can no / /
de la dge ba'i rtsa ba'i stobs can ni mi mthun pa'i phyogs kyis zil gyis mi non pa'i phyir ro / /
smon lam gyi stobs can ni rtag tu dge ba'i bshes gnyen dang phrad pa'i phyir ro / /
sems brtan pa nyid ni mi dge ba'i grogs pos mos pa bzlog kyang byang chub kyi sems yongs su mi gtong ba'i phyir ro / /
khyad par du 'gro ba