[A:92b]mtshan mo'i thun dang po la 'chag pa dang 'dug pas sems kyi sgrib pa sbyangs te / gung thun la gtsug lag khang gi phyi rol du rkang pa bkrus nas / nang du glo g.yas pa phab ste / sngas la mgo ma bzhag pa kho nar dgra bcom ste / skar n+ya gro dha'i phug tu phyin no / /
de nas 'od srungs kyis phyi ma'i dus kyi dge slong brjed ngas pa rnams kyi don du / snga dro tshigs bcad dang phyi dro lhug par bgro zhing / de yang sngar mdo sde bsdu bar bgros pa dang / 'od srungs kyis kun dga' bo la spro ba dris / gsol gnyis kyi las kyis mdo sde bsdu bar bskos nas / seng ge'i khri la dgra bcom pa lnga brgyas snam sbyar bting ste / de la kun dga' bo 'dug ste / mdo sde bzung ba thams cad bshad par bya'o snyam pa dang / lha rnams kyis shes nas gus par nyan no / /
de nas 'od srungs kyis ston pa 'jig rten phan bzhed pa / /
rgyal bas gsungs pa'i chos rnams kyi / /
rnam pa mchog ni gang bshad pa / /
tshe dang ldan pas mdo [B:83b]sde gsung / /
zhes gsol ba btab bo / /
de nas kun dga' bos / ston pa'i yon tan dran pas kha byang chub snying por bltas thal mo sbyar te / sgras khyab par byas te / 'di skad bdag gis thos pa'i dus gcig na / bcom ldan 'das yul w'a ra Na si drang srong smra ba ri dwags kyi tshal na bzhugs so / /
zhes brjod ma thag lha mi rnams mya ngan skyes te / kye ma 'jig rten 'di dag tu / /
mi rtag par ni khyad par med / /
gang gi rin chen gter de yi / /
yon tan rgya mtsho dag kyang bskams / /
gang las bdag gis sngon thos pa / /
chos ni thar pa'i dbye ba byed / /
'di skad thos zhes rab sbyar te / /
de yang di ring bsgrags pa yin / /
zhes so / /
de nas