[A:94a]pa [C:125]dang / bslab pa mang po dang / rtsod pa zhi byed dang bcas pa dang / rjes bcas dang / spang gnang dang / rab byung dang / gso sbyong dang / dgag dbye dang / phra mo dang / gleng gzhi dang / mos pa ni 'di'o zhes 'dul ba bsdus nas / nye bar 'khor khri las babs so / /
de nas 'od srungs kyis ma 'ongs pa'i gang zag gi don du / ma mo bsdu ba'i phyir gsol ba gnyis kyi las byas te / ma mo zhes bya ni bdag kho nas smra bar bya ste / ma mo lta bu ni shes bya'i mtshan nyid rab tu gsal bar byed pa ste / 'di lta ste dran pa nye bar gzhag pa bzhi dang / zhes sogs sngar bzhin no / /
de nas lha rnams kyis dgra bcom pa lnga brgyas sde snod gsum bsdus pas lha 'phel lha min 'gribs so / /
zhes sgrogs shing lnga brgyas yang dag par bsdus pa zhes pa'i ming du gyur to / /
de nas 'od srungs chen pos / kye ma stobs bcu mnga' ba'i gsung ni tshad med pa / 'gro la phan phyir chos kyi bstan bcos 'di bsdus pas / gang na 'jig rten blo ngan mun byed chud zos pa / blo gros rab rib bas la bas sgron mar yang dag ldan / / de nas 'od srungs kyis ston pa'i gsung ci nus su bsgrubs shing phan gdags pa cung zad byas te / ma lus par sus nus nga mya ngan las 'da' bar bya'o snyam ste / bdag gis thub pa'i mdo sde ni / /
yang dag bsdus nas chos lam bzhag /
gcig nas gcig tu yun ring bar / /
ston pa'i gsung rab 'di gnas 'gyur / /
ngo tsha med rnams chad pas bcad / /
ngo tsha byed ni yongs su bzung / /
bdag gis phan dang dge byas pas / /
bdag ni mya ngan 'das dus bab / /
kun dga' bo shes par gyis shig /