[A:118b]lag pas bsub tu gzhug dgos gsung ste / bstan bcos lan gyi phung po'ang brtsams te / rgya gar du 'byon bar chas pa dang / dbyig gnyen gyis gsan nas / slob dpon 'dus bzang ni bye brag tu smra ba'i grub mtha' la byang ba yin pas / zlog par dka' la / de pham yang dgos pa med pas rang byung gi mchod rten bltar 'gro zhes bsgrags la bal yul du 'gro'o snyam nas byon no / /
de'i rjes la slob dpon saMgha bha dra 'dus bzang ngam / dge 'dun bzang po 'khor rab tu byung ba mang po'i gos ngur smrig gi 'od kyis nam mkha' dmar por song ba tsam byon te / n'a len drar zhi bar gshegs so / /
slob dpon dbyig gnyen ni bal yul du hang ngu zhes pa rab byung gi cha byad 'dzin pa sdom [C:157]khrims la mi gnas pa / chang gi bum pa thogs pa mthong nas / bstan pa nub 'dug gsung nas skyo ba skyes te / rnam rgyal zlog nas bton pas 'das te / mchod rten brtsigs pa da rung yang yod par grag go /
mdor na rigs mchog tu gyur pa bram ze'i rigs las rab tu byung ba'i dge slong / skye ba lnga brgyar paNDi tar gyur cing 'bum sde dgu bcu rtsa dgu'am / brgyad cu'i don rtogs shing thugs la mnga' ba 'bru mar gyi bcing ba mdzad nas zhag bcu gnyis su zhal bton mdzad pa'i shes rab kyi dbyig dang ldan pa / brtse ba'i sgo nas bstan pa dar bar mdzad pas / 'gro ba'i gnyen du gyur pa ste / ji skad du / blo ldan rnams mchog 'jig rten gyis / /
sangs rgyas gnyis pa ltar brjod gang / /
[B:107a]'gro ba'i yang dag gnyen gyur pa / /
dbyig gnyen zhes bya des mdzad do / /
zhes pa dang / sa'i stod 'grel las kyang / 'phags pa thogs med