[A:145b]dga' ba rnams khros te / chos khrims bshig par lkog chad byas te / lha sras gtsang ma rab tu byung ba gro mor sbyugs / btsun mo ngang tshul ma dang / ban de chen po dpal gyi yon tan / nal bshams zhes phra ma bcug ste ban de chen po bkum / btsun mo lcebs / /
btsan po dgung lo so drug /
lcags mo bya la dba' rgyal to re dang co ro legs sgra gnyis kyis / zhal ltag par bstan te bkrongs so / /
de nas btsan po glang dar ma 'u dum btsan la chab srid gtad / the'u rab dba' rgyal to re nang blon du bskos / blon sna nam rgyal tsha khri gsum la sogs kyis / chos khrims dang 'gal ba mang du byas / lo paN gnyis kyis chos bsgyur ba'i grwa zhig ste / bsgyur 'phro la lus / 'on cang rdo la rab gnas ma grub par lus so / /
de nas btsan po nar son pa dang / thugs su gdon gsol te / rab tu byung ba kun phab / btsun pa'i rtags bor du ma 'dod pa kun / mda' gzhu rnga gshang bskur nas rngon pa la btang mi nyan pa rnams bsad do / /
lha sh'akya mu ni bsgul ma nus par / bye thems su bcug ste sbas / sgo brtsigs te zhal zhal byas nas btsun pa chang 'thung ba'i ri mo bris te bzhag go /
bsam yas dang / ra mo che'i sgo la 'dag zhal byas / po ti phal cher lha sa'i brag [B:131a]la sbas so / /
de nas ring zhig na / yer pa'i lha ri snying po na / lha lung dpal gyi rdo rje sgom gyin yod pas tshor te / [C:192]btsan po la snying rje khyad par can skyes te / rta dkar po la sogs ba'i phye mas byugs / ber nang dkar la phyi nag pa gon / lcags mda' lcags gzhu khyer nas / lha sar phyin pa dang / btsan po rdo rings kyi yi ge