[A:17a]rgyas pa'i sde snod ni nges pa'i tshig gi tshul gyis theg pa rgyas pas na shin tu rgyas pa ste / stong phrag brgya pa la sogs pa dang ldan pas chos chen po dang / sems can thams cad kyi don gyi phyir rdzogs pa'i byang chub tu sems bskyed pas sems bskyed pa chen po dang / chos shin tu zab pa dang rgya che ba la mos pas mos pa che ba dang / bdag gzhan mnyam pa'i bsam pa thob pas bsam pa rgya chen po dang / sar chud nas skad cig re re la bsod nams dang ye shes kyi tshogs dpag tu med pa gsog pas tshogs chen po dang / bskal pa grangs med gsum du brtson pas dus chen po dang / sems can thams cad dang mi mnyam pa'i sangs rgyas kyi sku 'grub pas yang dag par 'grub pa chen po ste / chen po bdun dang ldan pas theg chen no / /
mdo sde rgyan las chen po bdun 'di las cung zad mi 'dra bar 'byung ngo / /
yang dbang po rtul po rgyu la mos pas rgyu lam du byed pa la rgyu mtshan nyid kyi theg pa dang / rnon po 'bras lhun grub la mos pa la 'bras bu lam du byed pa 'bras bu sngags kyi theg pa gnyis yin te / [B:15b]mdo sde gdams ngag 'bogs pa'i rgyal po las / 'jam dpal gyis / 'dren pa'i theg pa gsum po dag /
bcom ldan nges par gsungs lags na / /
rgya 'bras lhun grub tu spyod cing / /
sangs rgyas gzhan nas mi 'tshol ba'i / /
nges pa'i theg pa cis ma gsungs / /
zhes zhus pa dang / rgyu la mos pa [C:22]rgyu chos kyi / /
'khor lo rab tu bskor byas nas / /
rdo rje theg pa'i nyi lam zhig /
ma 'ongs dus na 'byung bar 'gyur / zhes so / /
sngags mtshan nyid kyi khyad par ni / slob dpon tri pi ta ka ma la'i