[A:38b]brjod pa bzhin / /
bdag nyid nan tan nyams par 'gyur ba ste / /
smra la dga' ba'i nyes pa 'di dag go /
de ni g.yo ldan yang zhing re 'chad 'gyur / /
phyi phyir zhing ni rnam par 'gyed pa rtsom / /
'phags pa'i dam pa'i chos las rab tu ring / /
smra la dga' ba'i nyes pa 'di dag go /
mthu chung bsti stang gis ni dga' 'gyur te / /
mi shes ldan pa g.yo zhing 'gyur ba yi / /
spre'u ltar de yi sems ni g.yo bar 'gyur / /
smra la dga' ba'i nyes pa 'di dag go /
rang gi blo yi shes pa dma' ba'i [B:34b]phyir / /
rmongs pa de ni gzhan gyi dring la 'jog /
de ni nyon mongs phyogs kyi dbang du 'gro /
smra la dga' ba'i nyes pa 'di dag go /
mig kyang 'khrul zhing de bzhin rna ba'ang 'khrul / /
sna yang 'khrul zhing de bzhin lce yang 'khrul / /
lus kyang 'khrul zhing yid kyang 'khrul bar 'gyur / /
smra la dga' ba'i nyes pa 'di dag go /
de yi sems ni rna ba'i rnam shes la / /
rab tu chags shing sgras rgyags shes rab nyams / /
log par sems shing lam ngan [C:51]'gro bar 'gyur / /
smra la dga' ba'i nyes pa 'di dag go /
zhes pa la sogs pa gsungs nas / yun ring dus nas smra la dga' bas na / /
de ni bdag nyid dga' ba mi thob bo / /
tshig gang dga' ba mtha' yas thob 'gyur ba / /
tshig gcig tsam zhig bsams kyang mchog yin no / /
bu ram shing shun snying po ci yang med / /
dga' bar bya ba'i ro ni nang na 'dug /
shun pa zos pas mis ni bu ram ro / /
zhim po rnyed par nus pa ma yin no / /
ji ltar shun pa de bzhin smra ba ste / /
ro lta bu ni 'di la don sems yin / /
de lta bas na smra la dga' spongs te / /
rtag tu bag yod byos la don soms shig /
ces gsungs so / /
tshul 'di mang thos bsgrub pa dang bral ba / /
tshogs ma bsags kyi bu ston kha ches bris / /
dge bas myur du shi 'phos dga' ldan du / /
mi pham chos kyi dga' ston myong bar shog /
chos kyi 'byung gnas gsung rab rin po che'i brjod las / 'chad nyan la 'jug tshul nges par bstan pa'i le'u ste / dang po rdzogs so / / / /
IV.