[A:109] mdzad pa | gsung sgros mdzes pa'i tshig gis rjod byed nyung la don rab tu gsal ba'i go bde yid la 'thad pa'i sdeb sbyor gyi rtsom pas mkhas dbang gzu bor gnas pa'i thugs la dgyes pa cir yang ster ba'i sgo nas nyid kyis rtsom chos yang | gsung rab spyi 'grel | legs bshad rdo rje 'phreng ba | gzhi lam 'bras bu'i gsal byed | sbyor drug gi khrid gzhung | gong ma mchog gi dbang bzhi'i cho ga | 'khor lo sdom pa che chung | sgyu 'phrul drwa ba | gsang dus rnams kyi sgrub thabs | dus 'khor lha dgu'i sgrub thabs | dus 'khor gyi cho ga | dus 'khor mngon rtogs rnam bshad | blo sbyong 'grel pa | lung sbyor rin chen 'phreng ba | mkhan grags rdor gyi rtsod lan che chung sogs mdo sngags rnam bshad dang | chos ga'i rigs sogs ches mang yod rigs su 'dug kyang deng skabs dpe tsam yang dus dbang gis dkon pa ltar du song ngo | | de dag ni bstan 'gro'i don mdzad pa'i skor te gsum pa'o | |
de lta bu'i bstan 'gro'i dpal gyur gang gi sngon las smon lam zab mo'i legs mthu las nye bar 'khrungs pa'i mdzes sku don dam ye shes kyi rang mdangs las mi'i sha tshugs su shar ba ches ngo mtshar ba'i mtshan dang dpe byad kyi rnam cha gsal ba gsung gzhom bral rdo rje'i dbyangs rnam pa du ma'i chos don ston pa'i rjod byed ches khyad par ba thugs dri bral chos dbyings dag pa'i rang zhal ji bzhin mngon du gyur pa sogs thun mong ma yin pa'i gsang ba gsum gyi rlabs po che'i yon tan pha mtha' bral ba rnams kun nas gzhal bar dka' zhing thun mong tshar mthong gi ngo tsam la'ang khong nyid rdo rje'i rnal 'byor gyi ting nge 'dzin la mnyam par bzhag pa'i ngang nas gzhan mang po la legs bshad chos kyi dga' ston ngo mtshar ba 'gyed pas rang rang la gang 'tsham gyi re 'dod skong bar mdzad pa dang | bkod pa lus kyi rdzu 'phrul rdo rje'i sgyu ma'i gar gyis dar lwa'i yol ba'i steng nas phan tshun rgyu 'grul gyis ya mtshan rtse mo thun mong gi mthong snang du gyur pa dang | mi g.yo rdo rje'i skyil mo krung bcas mchod rten gyi gser tog rtser nam mkha'i dbyings su g.yo med du bzhugs pa dang | thugs mngon shes mchog gis lkog tu gyur pa'i gzugs sgra sogs ji bzhin sgrib med mngon sum du mthong zhing las bzhi'i 'phrin las la thogs pa med pa'i stobs kyis mtha' 'khob gang 'dul gyi gdul bya 'dul ba la drag pos tshar gcod dang brtse bas rjes bzung gi sgo nas rlabs che ba'i spyod pa mchog gis snyigs dus kyi 'gro ba nyam thag pa gang dag nges par skyong ba'i mdzad pa bzang po'i mthu nus 'gran zla dang bral ba mang zhing | khong gis rnam dkar las kyi 'khor lo yang | lha khang phyi nang gi bkod pa yongs rdzogs che khyad can dang | gzhal yas khang sogs sku'i rten mang po dang | dus kyi 'khor lo'i rgyud dang rgyas 'grel brgya rtsa'i grangs dang | bka' 'gyur bstan 'gyur sogs gsung rten khyad 'phags mang po dang | mchod rten bkra shis sgo mang legs pa'i thugs rten yang mang po legs bzhengs mdzad nas spyir rgyal ba'i bstan pa dang khyad par nges don