[A:120] dgur son skabs zhal snga nas | nyid kyi rnam thar gyi chings mdor bsdus sdom tshig tu legs par gsungs pa las |
thog mar dam pa'i rnam thar 'chad tshul ni | kye ma bskal pa las kyi snyigs ma 'dir | | 'tsho ba las 'das dam pa'i rnam thar la | | gus dang 'dri ba nges shes su yi skyes | | sngon gyi bag chags rang rang las kyis 'khor | | 'on kyang gsang pa'i skal ldan yid ches dga' | | phan snyam blo la bab yod tsam du bshad | | ces snyigs dus 'dir skyes bu dam pa'i rnam thar la gus pa dang 'dri ba nges shes skye ba shin tu dkon pa ni sngon las ngan pa'i dbang gis yin kyang skal ba dang ldan pa'i yid ches can rnams kyi don du khong gis rang nyid kyi rnam par thar pa mdo tsam bshad par gsungs pa ltar te |
de yang dus gsum dang 'brel ba'i rnam thar gyi sdom spyir bstan pa ni | ji skad du | rgyal sras thogs med sgyu 'phrul byed po gar | | dal 'byor phun tshogs nor ldan yongs su bskrun | | byang sems dge ba'i blo gros nor gyis phyug | | don gnyis 'bras bu mi zad mngon brdal bas | | 'gro khams yongs su dag pa'i mgron 'di byas | | zhes khong gi sngon 'das pa'i dus na rgyal tshab mi pham pa dang 'phags pa thogs med nas bzung sprul sku rim par byon pa gang dag kyang rten phun sum tshogs pa'i sgo nas byang chub sems dpa' rnam dkar dge ba'i chos kyi blo gros yid bzhin gyi nor bu lta bus rang rgyud mngon par phyug bzhin tshul de ltar la gzhan 'gro ba mtha' yas 'god par mdzad pa'i don gnyis kyi spyod bzang khyad par bas gdul bya dus su babs pa'i 'gro ba ches mang po rjes su bzung ste yang dag chos kyis de kun mgron du yang yang bos te 'gro don rgya cher byas zin gyi rnam thar gsungs pa dang | da ltar gyi mdzad pa'ang | ji skad du | gang 'di sa chen 'di na dam pa'i chos | | srid zhi phun tshogs dge legs mngon mdzad pa'i | | thob bstan snying po mi nub rin chen gter | | yongs su chub di sngon goms kho na lags | | zhes da ltar gyi skabs su dam pa'i chos srid zhi'i legs tshogs mtha' dag 'byung ba'i gzhi gcig gyur thub pa'i bstan pa mchog gi yang snying nges don gzhan stong dbu ma chen mo'i dgongs don yun ring mi nub par dar zhing rgyas pa'i gnyen du zab chos rin po che'i gter lta bu de ji bzhin yongs rdzogs khong gi thugs nyams su byang chub pa'i mdzad bzang zla dang bral ba 'di sngon bsags rnam dkar rlabs che ba las nges par byung ba'i rnam par thar pa yin tshul gsungs pa dang | 'di nas ma 'ongs pa'i mdzad pa la'ang gnas skabs dang mthar thug gnyis las | dang po ni | ji skad du | skye dang skye ba'i 'phreng bar legs bzung nas | | rtogs ldan bsod nams bzang po lam gyi rim | | ma rig 'khor ba'i rab grol kun rdzogs pa'i | | chos nyid sgyu ma'i gzhan phan 'di kho na | | zhes ma 'ongs pa'i gnas skabs skye ba'i 'phreng ba rnams su'ang nges don gnas lugs zab mo ji bzhin