[A:8] nyi zla'i zer gyis phog pa dang | | de dag rang gi yon tan 'byin | | de bzhin kun gzhi'i shes pa rab | | de bzhin gshegs pa'i snying po dge | | zag med legs dang ldan gyur te | | gzhan du gyur na rab tu 'byin | | zhes gsungs pa ltar nyi zla'i rigs kyi nor bu la nyi zla'i 'od kyis phog pas rang 'od cher 'byin pa ltar thabs mkhas lam gyi byed pa la brten nas rigs khams bde gshegs snying po kun gzhi'i rnam shes las gzhan pa gang las zag med ye shes kyi chos mtha' dag 'byung ste mngon tu gyur ba'i tshul 'di rgyal ba'i dgongs pa mthar thug tu legs par grub phyir nges don dbu ma chen po'i chos kyi khungs chu mgo gangs la thug pa lta bu 'di ga'o | |
spyir ni bka' bar du gtso bor rang stong bstan zhing bka' tha mar nges don gzhan stong gtso bor bstan pas de gnyis kyi khyad par kun rdzob don dam gyis bsdus pa'i chos thams cad rang ngos nas grub pas stong pas rang stong dang | kun rdzob rnams rang ngos nas grub pas stong yang don dam pa'i chos nyid ni nam yang rang ngos nas mi stong par gnas lugs mthar thug tu ye nas 'gyur ba med pa'i rang mdangs la gzhan kun rdzob gzung 'dzin gyi spros pas stong pas na gzhan stong zhes brjod cing | kun rdzob bden par med kyang don dam gnas lugs mthar thug tu bden pas mtha' gnyis spangs pa'i nges don dbu ma'i lam bzang chen mo de yang gtso bor 'khor lo tha ma'i sde snod du bstan kyang spyir ni 'khor lo dang po dang bar pa gnyis kyi'ang dgongs pa mthar thug tu nges shing de lugs kyi tshul du bstan par gsungs la | 'di dag gi skor la bshad bya mang yang re zhig de tsam mo | |
(2) theg chen gyi chos rgya gar du rjes nas ji ltar dar tshul |
gnyis pa rjes nas ji ltar byung tshul ni ston pas chos 'khor gsum po bskor zin mi ring ba na thun mong ngor theg chen gyi sde snod rnams ni | lha klu sogs kyis rang rang gi gnas su spyan drangs te re zhig mi yul du mi bzhugs la theg dman gyi mdo sde la brten nas dge sbyong gi 'bras bu bzhi po mngon du byed pa'i 'phags tshogs kyi 'dus sde bsam gyis mi khyab pa byung zhing | rgyal ba mya ngan las 'das rjes su dgra bcom 'od srungs chen pos (1) theg dman gyi bka' bsdu dang po mdzad nas bstan pa kun dga' bo la (2) gtad pa nas bzung ste rim bzhin | (3) sha na'i gos can dang | (4) nye sbas dang | (5) dhItika gsum gyis bstan pa bskyangs te 'phags pa dhItika 'di'i sku dus shig na yangs pa can pa'i dge slong dag gis mi rung ba'i gzhi bcu spyod bzhin gzhi de dag ston pa'i bstan pa yin par bsgrags skabs dgra bcom grags pa sogs dgra bcom pa bdun brgyas de sun phyung ste bka' bsdu gnyis pa mdzad |