[A:12] 'phags bod du ji ltar byung ba'i tshul mang ngo | |
smras pa | bde gshegs nges don dgongs bcud 'dab stong tshul | | dus kyi dbang gis re zhig zum pa'i mdo | | mi pham legs gsung rta ljang tsha zer gyis | | skal bzang rkang drug bsod nams dpal du bzhad | | ces pa'ang bar skabs kyi tshigs su bcad pa'o | |
gnyis pa | sngags phyogs nas rim par brgyud tshul |
gnyis pa sngags phyogs nas rim par brgyud tshul la | ston pas ji ltar gsungs tshul dang | rjes nas ji ltar byung ba'i tshul gnyis las |
1. ston pas gsang ba sngags kyi rgyud sde ji ltar gsung tshul |
dang po ni rgyud las | shin tu rnam dag chos kyi mchog | gdod nas grol ba de bzhin gshegs | | kun tu bzang po kun bdag nyid | | byang chub sems dpa' bdag grub mdzod | | ces gsungs pa ltar sngar ston pas phar phyin theg par nges don chos nyid bde gshegs snying po gnas lugs mthar thug tu bstan pa nyid 'dir gsang chen bla med theg pa'i skabs su shin tu rnam par dag pa'i chos nyid gdod ma nas grol ba chen po de bzhin gshegs pa kun tu bzang po don dam pa'i rnam pa kun gyi bdag nyid can | zhes pa'i mtshan gyis gzhi'i chos nyid du legs par bstan pa'ang sngags kyi gzhan stong dbu ma chen po yin la | de nyid bde stong zung 'jug gi ngo bor mngon du byed pa'i thabs la drug ldan rdo rje lus kyi rtsa rlung thig le la gnad du bsnun pa'i thabs khyad par can gsang chen bla med kyi chos kyi mdzod chen po ston pa nyid rnam par snang mdzad 'khor los bsgyur ba chen po dang | chos kyi dbyings gsung gi dbang phyug sogs kyi sku'i rnam par gnas 'gyur te thun mong ma yin pa'i sngags kyi gdul bya mchog rnams la legs par phyes nas rjes su bzung ste | ring por mi thogs par zung 'jug mchog gi go 'phang la bkod pa yin te | de yang ston pa bzhugs pa'i dus re zhig gi tshe ston pa'i 'khor dgra bcom pa rnams gling gzhan la 'phur te 'gro 'ong byed pa o rgyan yul gyi rgyal po indrabhutIs gzigs pa na thag ring bas cha ma phyed de | blon po rnams la bya dmar po'i khyu 'di rnams ci yin dris pas | blon po rnams na re | lha cig 'di ni bya ma lags | drang srong chen po sangs rgyas kyi nyan thos lags so byas pas | rgyal pos sangs rgyas lta 'dod pa la | blon po rnams kyis thag ring bas mi 'byon zer ba na | rgyal pos gsol ba btab pas nang par gdugs tshod la sangs rgyas dgra bcom lnga brgya bcas byon pa la