[A:227] lam mer bstan nas khong gi phyag gis rdo rje dar sna lngas brgyan pa de nyid kyis slob bu khong nyid khrid de byang sgo nas rim pas nang du 'jug par mdzad de lha tshogs ma lus pa'i lha ngo legs par bstan tshe lha de dag gi zhal nas dbyangs gsal gyi sgra gdangs dang bcas yi ge de 'dra dpag med spro ba rdo rje slob dpon gang nyid kyi lus la thim pas rgyud byin gyis rlabs te dkyil 'khor gyi gtso bo'i bka' lung las skal ldan rdo rje'i slob bu de nyid kyis ma 'ongs pa na ring min du dus kyi 'khor lo chos dbyings gsung gi dbang phyug rigs kun gyi khyab bdag de ji bzhin mngon du 'gyur nges kyi lung bstan dbugs dbyung dus su thob pa'i dge mtshan dag snang ya mtshan pa'i thugs snang nye bar byung ba dang | yang bar 'ga' thugs bzhag mgor nam mkha'i khams kyi thig le ljang gsal rnga bo che'i tshad tsam pa'i nang du rgyal ba mi bskyod pa'i sku brjid che ba nges pa gsum ldan gyi longs sku'i rnam par mthong ba dang | skabs re thig le gsal 'tsher yungs 'bru tsam pa'i nang du zhing khams rab 'byams kyi snang brnyan gsal lor ngom pa sogs kyi nyams snang 'phel zhing | srog 'dzin skabs thugs snang ngor rang lus kyi nang du rtsa dbu ma sbrul chen lta bu'i rnam par shar ba'i nang du stong gzugs rab 'byams kha ba bu yug ltar 'tshubs shing dbu ma'i dbyings de nyid du thim 'gro ba'i gsal snang che ba byung zhing stong gzugs lha sku'i snang ba 'byams klas dang grub thob rig pa 'dzin pa'i tshogs grangs med bcas skad cig la rang lus kyi nang du gsal bar 'char ba yang yang byung la | rmi lam 'od gsal la brten nas zhing khams gang 'dod du phyin nus pa sogs dang | 'khrul 'khor gong 'gab dang dran ting gnyis kyi dus thugs snang du grub chen du mas lus sbyong dang thig le'i 'khrul 'khor gyi phyag rgya mdzad pa la gzigs bzhin khong gis 'khrul 'khor 'khyer zhing | de skabs rgyun du thugs snang la ye shes khams kyi 'od sngon po 'ba' zhig pas dus 'da' ba dang bcas lan cig yan lag lnga sbyong cha tshang rigs drug bcas rlung khug gi ring du mdzad nus pa sogs tshul de 'dra'i sgo nas lo gsum gyi ring du dam pa 'dis sbyor drug nyams len gnad du khel zhing phul du byung ba ji bzhin gyis thugs dam zla dang bral ba sgo kun nas legs par mdzad pa ste de dag gi ring du dbang dang zab khrid gtso bo rje sngags pa rdo rje 'chang gis mdzad cing dus 'khor dbang chen gyi dus su rje nyid gong du bzhugs nas dbang bskur ba po ngag dbang tshogs gnyis rgya mtsho yin cing | de skabs su slob bu dam pa 'di'i thugs nyams su rje sngags pa rdo rje 'chang nyid kun mkhyen jo nang pa chen po'i sku dngos su mthong zhing | 'di skor thugs slob mchog de la chos khrid kyi gsal gdab ci dgos rje tshogs gnyis rgya mtshos mdzad la dbang lung 'gangs che ba rnams bla ma bsod nams bzang pos gsungs pa'i sgo nas sbyor drug chos skor yongs rdzogs dang de min gyi nyer mkho'i chos bka' yang mang tsam nod pa yin |