[A:228]
dgung lo nyi shu'i steng du rje sngags pa mkhan po gong bzhugs kyi sgos brtan mkhas mchog dge slong bsod nams bzang pos zhang ston 'dul chog gi lag len la brten nas mkhan slob gang 'os dang | de lugs bzhin gyi dge 'dun grangs tshang gi mdun du | dam pa 'di la rab byung so thar gyi dge tshul slong gi sdom pa rim gyis legs thob la | dgongs nyams su rje sngon 'brel zab mo'i sprul pa'i bzhes gnyen gang gis slob bu 'di la dpal gsang ba 'dus pa'i ye shes chen po'i zab dbang legs bskur gyi ngang nas ma 'ongs pa na 'jam pa'i rdo rje'i mdun du 'gyur ba'i dbugs dbyung gzengs bstod kyang thob |
dgung lo nyer gcig gi dus su 'dzam thang gtsang pa'i sgrub grwa gong mar rab kha bla ma kun dga' mkhas grub dbang po rdo rje slob dpon du dam pa 'dis bsten nas lo gcig la sbyor drug nyams len mdzad pas thugs kyi mngon rtogs sngar las ches cher 'phel ba byung | 'di skor khong gi thugs snang ngor sprul pa'i bzhes gnyen mchog nyid kyi thugs chos sku kun khyab kyi rang bzhin du nges pa la rnam pa tsam sku'i bkod pa sangs rgyas sman bla'i zhing dang gsung gi bkod pa mkha' spyod dag pa'i zhing dang | thugs kyi bkod pa bde ba can gyi zhing rnams su nam yang ris bral sprul bkod kyi rnam par thugs thag chod nges su yang yang byung ba yod la | dgung lo nyer gnyis par rje bla ma'i zhabs drung sgrub gnas de nyid du dam pa 'di nyid slar yang sbyor drug tu lo gsum bzhugs skabs klad rje rin po che sngags pa rdo rje 'chang gis byin rlabs kyi dbang khrid gsal che ba rnams mdzad pa tsam las gzhan dbang bka' chos khrid ci dgos thams cad rdo rje 'chang gnyis pa ngag dbang tshogs gnyis rgya mtsho dang dge slong rdo rje 'dzin pa ngag dbang bsod nams bzang po gnyis kyis legs par mdzad pa ste 'di skor snga phyi ci rigs su rje bla ma rnam gnyis kyi drung nas dam pa 'di la chos bka' ches mang zhig thob pa yin la | de ltar dgung lo nyer gnyis nas nyer bzhi yan la nyid kyis sbyor drug nyams len skabs rtsa rlung gi nus pa cher smin pas thig le dkar dmar la gnad du thebs tshabs che bas thugs snang ngor rang gi 'og phyogs pas nas nyi ma 'char zhing steng phyogs nas zla ba shar bzhin pa'i bar na 'bru drug shing ljon sna tshogs pas gang 'dug pa'i gtum mo dang byang sems 'bar 'dzag gi snang ba dang ye shes kyi rtsa nang du mkha' rlung ro mnyam gyi dag snang khyad par ba de lta bu'i tshul yang yang byung ba'i mgo bzung ba nas dag snang mchog gi klong rdol zhing gnas lugs 'od gsal gyi rig gdangs su ji bzhin brjod mi nus pa'i dag pa'i zhing khams bye ba rab 'byams kyi bkod pa der bzhugs rgyal ba'i mdzad chen gyi mtshar bkod dang bcas ma 'dres pa legs par gzigs pa'i ye shes dam pa'i mkhyen spyan mnga' bar gyur to | phyi ma'i lo der sa dmar bla ma snyan grags kyi mdun nas khong gis dus 'khor dbang chen dang | nai gu bka' nang yongs rdzogs sogs chos bka' du ma zhig gsan |