[A:21] mkhas mchog thams cad zil gyis mnan | mdar dang don mo rir zur chos kyang mdzad | de nas 'jam gsar gyi gdan sa rkyang 'dur gyi chos dpon mdzad cing | kun mkhyen chos sku ba la mnga' ba'i gzhung gdams ngag thams cad gsan | khyad par dus 'khor rwa lugs sngar nas mkhyen cing | kun mkhyen chos sku ba la 'bro lugs kyi dbang rgyud bshad dang sbyor drug nyams khrid du ma gsan pas nyams rtogs kyi klong brdol | spyir sbyor ba yan lag drug pa'i gdams pa mi 'dra ba bcu bdun tsam gsan cig nyams su myong bar mdzad | srog rtsol bsgoms pas 'byung lnga'i rlung stobs su gyur te thugs nyams 'ur langs phyag ya re mi bcu bcus mi thub pa dang | gzims khang na yod pa rnams res 'ga' 'khyags te mi tshugs pa dang | res 'ga' tshad pas gdungs te mi tshugs pa dang | gzims khang yom yom du g.yo ba dang | bug sgo rtsig pa la thogs med du gshegs pa rnams byung | lan cig srog gegs cung zad byung ba kun mkhyen chos sku bas mngon shes kyis mkhyen nas phebs te bsal | der nyams rtogs mthar phyin nas spyan ras gzigs zhal bcu gcig pa sogs yi dam dpag tu med pa'i zhal gzigs | de nas 'chad nyan bor te kun spangs mdzad ri khrod nges med la thegs | lha sa'i jo bo bcu gcig zhal la gsol ba yun ring du btab pas spyan ras gzigs kyis dmar khrid kyi bka' brgya grol ba'i lung bstan byung | se mkhar chung du bzhugs pa'i tshe | grub thob se ston kun rig gi sku'i skye ba yin par yang thugs kyis drang | gzhi bdag rnying pa rnams kyis kyang ngo shes | rgyud kyi snying po mdzad pa'i thog mar dge ba'i gzigs ltas kyang byung ste | dus kyi 'khor lo'i rgyud kyi snying po bsdu bar dgongs nas gsol ba btab pas chos rgyal rigs ldan rnams dus gcig tu zhal gzigs nas bkas gnang | 'di la dge mtshan lan gsum byung | de dus brtan ma bcu gnyis kyi gtso mo nags sman rgyal mos jo nang du spyan 'dren pa'i zhu ba yang yang phul | de la da lta dus la cung zad ma bab pas da res mi 'tshal | lo gsum nas 'ong zhes zhal gyis bzhes | de bar du lha sa yer pa sogs dbus phyogs su 'gro don cher mdzad | sngar gyi phyi nang gi rten 'brel 'dzoms pa las lo gsum gyi mtshams de nas spyi brag nags gsum gyi mkhan slob dge 'dun thams cad mgrin gcig pas nan tan du gsol ba btab pa la brten nas gnas mchog dam pa 'dir chags phab | de tsa na gnas 'di'i rgyun bzhugs sgrub pa po sum cu tsam yod par grags | thog ma lo gcig seng rdzong du bzhugs | de nas 'khyog po'i btsan gyis gdan drangs | 'khyog por gzims khang mkha' spyod bde ldan du thog mtha' bar gsum du dge ba'i mtshan ma brnyes nas rgyud kyi snying po rtsa 'grel tshang bar mdzad | rnal 'byor yan lag drug pa'i man ngag snyan brgyud du bzhugs pa rnams yi ger 'god par mdzad pa na dus kyi 'khor lo nyid zhal gzigs lung bstan thob | 'dir sbyor drug gi khrid yig rgyas pa bod du byung ba'i snga shos yin |