[A:29] btab nas 'chad nyan gyi grwa btsugs | der snying ba zhig gyis rkyen byas zhag bcu gnyis kyi ring sangs rgyas kyi zhing khams dang | yi dam gyi lha bgrang bar mi dpyod pa zhal gzigs | rin sding gi lcags zam 'dre gdug pa zhugs pa zhig thugs rtog mi mdzad na bsnoms par zhu zhes bdag pos phul ba la | 'dren thag btang mtshams lcags kyi tshur kha nas bka' shog bsgrags pa tsam gyis phar phyogs kyi lcags thag rang chad la song ste | tshar phyogs kyi zam rdur du phung gis byung ba sogs ya mtshan pa'i ltas mang | dbus dmag yong ba'i skabs shig zhag shas blo sbyong kho na'i chos gsungs shing bzod pa'i bsngags pa 'ba' zhig mdzad chos rar bzhugs thog dmag brgya tsam slebs | sku la mda' rdo mtshon cha sna tshogs 'phangs kyang cung zad kyang ma skyon cing g.yo med du bzhugs de nas dad pa skyes te bshags pa phul |
yang sa skya'i sgo rar dbang bskur mdzad pa'i ye shes dbab pa'i rol mo phyi rol gang 'chag pa'i mis tshor ba la yang ye shes phebs pa dang dbang bskur mdzad tshad la ye shes phebs pa dang | sha grags seng sogs skyes bu dam pa du ma zhal mthun par rigs ldan gyi sprul par lung bstan pa dang | 'chims blo bzang grags pas 'phags pa spyan ras gzigs kyi sku dngos su gzigs pa yang yang byung ba dang | nye gnas nam mkha' byang chub kyis 'jam dbyangs dngos su mthong ba dang | bcom ldan rdo rje snying po dang | snang ba dag pa'i sgrub pa pho mo mang pos sku la mtshan dpe rdzogs par mthong ba sogs ngo mtshar ba'i ltas bsam gyis mi khyab pa mngon gyur du mnga' | don du ni 'phags pa spyan ras gzigs kyi rnam par 'phrul ba yin pas rigs ldan pad ma dkar po dang gnyis su med pa'i ngo bo nyid yin phyir rje thams cad mkhyen pa 'di la rigs ldan gyi sprul pa'i snyan grags che ba dang | dpal dus kyi khor lo'i chos kyi mnga' bdag chen por mngon sum du bzhugs pa la brten dus mnyam gyi dge bshes phal mo che zhig gis | chos 'di dang 'brel ba'i man ngag ci rigs pa ma gsan pa med pa lta bu yin | dbang rgyud man ngag rdzogs par gsan pa yang stong phrag mang po dang | dbang dang khrid cha tshang thob pa khri phrag brgal ba dang | mchog dbang gong ma dang so sor sdud pa'i khrid gsan cing nyams myong skyes pa ni bgrang bar mi dpog pa tsam yod par grags shing | spyir bstan pa sgo thams cad nas rgyas par mdzad | sgos su bod kyi ri sul thams cad rdo rje'i rnal 'byor gyi sgrub pa pos khyab pa dang | bshad nyan gyi grwa thams cad du snying po'i mdo dang rgyud bla ma'i bstan bcos brtsams phyir mi ldog pa 'khor lo'i gtam bde gshegs snying po seng ge'i sgras khyab par mdzad de | rnga bo che'i mdor lung bstan pa bzhin du lo brgyad cu lhag gi bar de lta bu'i rgyun gnas par gyur la | de rjes lta ba mtho ru re zhing drang don kun rdzob la lhag par zhen pa'i ngang tshul can mang du byon pa la brten sngon bzhin gsal bar ma gyur kyang dus kyi tha ma 'di lta bu la'ang rdo rje'i rnal 'byor sgom pa dang | de bzhin gshegs pa'i snying po'i gtam