[A:28] yongs rdzogs gzigs | de nas bzung yi dam zhal gzigs pa ni grangs las 'das te ches cher yang mi mdzad | 'phags pa spyan ras gzigs dang mi lab pa bzhin yod la | gur mgon dang rnam sras bran bzhin 'khol | phyag mchod thugs dam mdzad res kyi rigs gsum mgon po dang | 'phags ma sgrol ma dang | sman bla | byams pa rnams res mos kyis 'byon | mkha' 'gro rgya mtsho | sgyu 'phrul drwa ba | sdom pa che chung | rdo rje phag mo | rdo rje dbyings la sogs pa'i dkyil 'khor gzigs pa yang grangs las 'das | bde ba can gyi smon lam mdzad tshe bde chen zhing dngos su gzigs pa dang | gzims khang bde ba can du gu ru'i tshes bcu'i mchod pa mdzad pa'i tshe | slob dpon padma mkha' 'gro'i tshogs dang bcas mngon sum du byon nas shis brjod mdzad pa dang | mchod rten bzhengs pa'i las la zhugs tshad bde ba can du 'gro ba'i mtshan ma gzigs | spun gsum du bzhugs skabs thugs dam gyi lha jo bo bhugma la rab gnas mdzad pa'i tshe 'ja' 'od la bkra shis rtags brgyad kyi gzugs shin tu gsal ba nub phyogs nas byung ba dang | me tog gi tshogs kha dog sna tshogs pa mang po snyon med du babs | nam phyed sku 'bum nang du chu shor ba sogs phran bu rnams kyang 'phral 'phral mkhyen cing | gon ma yon mchod kyi mnga' thang 'gyur ldog dang | rgyal khams 'gyur ldog rnams kyang ji skad gsungs pa bzhin thog tu khel | hor gyi spyan 'dren 'byung ba yang snga mo nas dgongs | spyan 'dren byung ba'i tshe | nying ro dang | bar phug dang | na dum sogs su bden pa kho na brten pa lo bzhi tsam mdzad | phyis rgyal pos lung bzang po gnang nas phebs mi dgos par byung nas shin tu dgyes te dgon par phebs | de la rje 'dis jo nang gi gdan sa lo bcu bdun mdzad ring gtso bor jo nang nyid du bzhugs shing sgrub brgyud kyi bstan pa rgya cher spel | sku 'bum bzhengs pa dang | gsung sgrogs dang | mchod pa 'bul ba dang | mkhas pa du ma 'dus pa la mdo sngags kyi dbang dang gzhung bshad rgya cher stsal | tshogs pa yang sgrub pa snying por byed pa kho na rang yang nyung dus su stong tsam re 'tshogs shing | spyir tshogs pa nyung dus su yang nyis stong tsam re 'du ba byung | mang ba la tshad med | chos rje di la zab lam gyi 'khrid zhus pa la dge sbyor gyi sne ma zin pa ni gcig kyang med | mu ge byung skabs slob ma kun la dka' thub rigs mang du gnang dpon slob kun gyis mi zas spangs | gsol chas thams cad phongs pa rnams la gnang |
phyis chos rje'i thugs sras klubs lo tsA ba dang | rje phyogs las rnam rgyal bas gdan sa mdzad ring dben gnas nges med kyi ri khrod mang por phebs shing | phal cher ni thugs dam la bzhugs pa dang zab lam gyi 'khrid 'debs pa'i 'gro don nyid gtso bor mdzad par bar du chos gsungs bs dang | rten bzhengs pa yul so so'i lha khang la zhig gsos mdzad pa yang shin tu mang | ngam rings su chos sde