[A:385] lam sbyor drug gtso bor gyur pa'i bskyed rdzogs kyi zab mo'i khrid sna tshogs de lugs ltar gyi smin byed dbang bka' bklag lung sna tshogs bcas chos bka' slob tshogs rang rang dang 'tshams pa'i re ba ltar gyi rlabs po che'i chos sbyin mchog gi sgo 'phar legs phye mdzad nas bstan 'gro'i don rgya spel zhing | dam pa dang gi sku tshe gang bor nyams len la brtson pa lhur blangs pa'i byas rjes lam thun mong la myong ba thon zhing | thun min rim pa dang po'i lha'i gsal brtan dang rim pa gnyis pa'i yan lag lnga pa man chad kyi gzugs sems dbyer med rlung thig le'i rang mdangs su nyams kyi 'char sgo deng dus la ltos na khyad mtshar ba re yod nges su 'dug pas de lugs kyi slob bu dag gi snang ba'i 'char sgo yang tshod de tsam gyi dag snang 'phel ba'i cha nas snyigs dus su sngags kyi slob dpon du nye bar 'os pa zhig ste | nyid kyis mtshams bsnyen gong smos bzhin khyon hakSa yig drug rta mgrin bsnyen pa tshe bsnyen rnams dung phyur re re ljags bzlas mdzad pa sogs chos ldan rnam par dkar ba'i mdzad pa sgo gang thad nas mi dman pa'i 'phrin las yongs rgyas mthar phyin cing dgung grangs don gnyis pa'i lo de'i zla ba brgyad pa'i tshes nyer brgyad nyin dus sogs kyi dbang gis rang gnas kyi chos sde dag la gang 'tshams kyis chos mjug rdzogs par byas te 'dzi nyin gyi sa cha rgu nang du phebs te slob tshogs nye 'khor ba nyung shas dang lhan du spong ba bsam gtan gyi bya ba la mtha' gcig tu rem pa'i tshul gyis bar bar du slob tshogs la rang rang 'tshams pa'i 'di phyir phan pa'i zhal ta bka' mol zhib rgyas gnang zhing | de skabs shig nas sku cham cung zad cig las bsnyung ba'i rnam pa gang yang med par 'brel thogs bsngo dgos la 'pho ba dang nang slob 'ga' la chos mthun gyi zhal chems re yang bgyis nas zla ba bcu gcig pa'i tshes nyer gnyis kyi nub sku gzims pa'i tshul gyis seng ge nyal stabs kyi ngang nas thugs dgongs 'od gsal du bsdus te sku gshegs thugs dam zhag bdun du bzhugs nas rtags mtshan dang bcas dgongs bkrol gshegs mchod sogs bgyi ba gang dgos mtha' dga legs sgrub kyi tshul sogs zhib par bdag gis byas pa'i rnam thar du gsal la | gang gi slob bu yang nyams rtogs mnga' ba ches mang tshod du 'dug go | |
bkra shis lha rtse'i dgon chags 'debs po bla ma bstan gsal |
5. 'dzam thang gtsang chen sprul pa'i sku gsum pa gang nyid kyi dngos slob rtogs pa'i dbang phyug bla ma bstan gsal zhes bya bas 'dzi nyin phyogs su gsang chen sgrub brgyud kyi bstan pa spel tshul la thog mar gang gi lo rgyus yang nyid sku 'khrungs yul 'dzi'i smad phyogs kyi wa shul zhes pa'i sa cha de yin zhing | 'di'i sku rigs rong mo yin pas smra rong mu mtha' nas thog mar 'ong ba rus rong mo dang ming a rdor zer ba'i mi brgyud du sku 'khrungs la | de nas sku na rim gyis son te rang yul du phyugs rdzi thub tsam gyi byis pa'i skabs su rigs bzang po sad la nye ba'i dbang po ches mchog tu gyur cing klog sogs rig la