[A:404] dbang chos 'dzin dpal bzang po'i zhabs pad gus bsten byas nas rnal 'byor yan lag drug gi dbang lung zab khrid man ngag yongs rdzogs zhus nas nyams len gnad khel gyis rtogs pa mchog tu rgyas shing mthong snang sna tshogs dang mngon shes sogs yon tan gyi sgo rab tu yangs pa ste | de yang lha bzo bla ma'i mdun du khong nyid snga phyi ci rigs su bzhugs pa'i ring la thugs dag snang ngor bar skabs rje bla mas yi dam gang la bsnyen bzlas mdzad snyam du dgongs gtad kyi tshe bla ma nyid bde mchog yab yum rgyan ldan du ji bzhin gzigs te sgrub rdzas thod chang khol ba'i mtshan ma mngon sum mthong ba ltar don la thog tu khel | gzhan yang bar 'ga' bla ma nyid bde mchog gi dkyil 'khor rten dang brten pa'i bkod pa yongs su rdzogs pa de dbus gtso bo gser sgrom du bzhugs pa'i dag snang gi tshul dang | skabs la lar bla ma rdo rje rnal 'byor mar gyur te 'od kyis rgyud sde rab 'byams kyi lha sna tshogs spro bsdu byed cing rigs drug gi 'gro rnams 'dren par mdzad pa dang | bar skabs sgrub mchod kyi dus su bla mas rdo rje rnal 'byor ma'i ye shes kyi sku legs bzhengs mdzad de 'gro ba nyams thag mang po sdug bsngal gyi 'khrul snang las legs sgrol mdzad pa'i bkod pa ji bzhin gzigs mor byed pa sogs rtogs pa'i dbang phyug zla dang bral du gyur to | |
dgung lo bco brgyad skor 'dzam thang gtsang pa'i sgrub grwar bzhugs skabs rdo rje 'chang ngag dbang chos kyi 'phags pa dang | kun dga' dpal ldan zhabs pa rnam gnyis kyi drung du snga phyi rim par sbyor drug gi zab khrid mthong ba don ldan lhan thabs zung 'jug sogs zab bka' mang po dang | lha tshe skyabs mgon gyi mdun | sbyor drug zab khrid | gcod skor mang po sogs dang | rgya bla ma dkon mchog dang | sbyangs pa bla ma nges don rnam gnyis kyi drung nas sbyor drug chos skor yongs rdzogs gsan nas bla ma de rnams kyi mdun du nyams len la 'dri gtugs sna tshogs dang zab pa'i nyams myong gi dmar khrid so so dang bogs 'don spogs chog gang dgos thams cad legs par gnad la thebs te rtogs pa yar ldan bla blag tu song bzhin sgrub khang der lo gsum du bzhugs |
dgung lo nyi shu'i skor rnga yul du byon nas 'brog dge yon tan rgya mtsho'i sku mdun nas dge tshul slong gi sdom pa mtha' dag legs mnos mdzad | mnyam nyid ces pa'i mtshan gyi thog mar sbyor drug skabs ngag dbang dang bsnyen par rdzogs skabs kun dga' zhes pa'i mtshan snon kyang mdzad | 'di skor gong 'og ci rigs la bla ma chos 'phags kyi mdun drung du | shangs chos skor zhus nas naigu'i zab lam nyams len dang | lha bzo rdo rje 'chang gi mdun nas snga phyi ci rigs par spyir na bskyed rim cha tshang dang | khyad par rdo rje rnal 'byor ma'i dmigs khrid zhib rgyas gsan nas de dag la bsnyen tshad re re btang | sbyangs pa bla ma kun dga' nges don gyi drung du byang chub sems sdom yang gsan | 'ba'