[A:409] phyogs su 'gran zla dang bral ba'i 'dul ba 'dzin pa ches mchog tu gyur la | dgung lo nyi shu'i nang skor du 'dzam thang gtsang pa'i sgrub grwar lo gcig tu bzhugs nas ngag dbang chos 'byor zhabs pa'i drung du | naigu'i zab khrid zhus te nyams len gnad smin dang bcas phyag 'bum brgyad tsam legs grub bgyis | gzhan yang bla ma de nyid kyi mdun nas | byang chub sems sdom | bde mchog dang gshin rje'i rab 'byams cha tshang | rdo rje 'phreng ba'i dbang lung | rin 'byung sogs kyi dbang bka' thob | dam pa 'di nyid la dge skor bla ma bstan 'dzin grags pa sogs skyes chen du mas 'dul 'dzin mchog tu yang yang bsngags pa'i me tog dus su 'thor |
dgung lo nyer bdun sogs su rab kha bla ma mkhas dbang gi mdun du kun mkhyen dol po'i bka' pod yongs rdzogs kyi bklag lung dang | sngags pa bla ma mnyam nyid kyi drung nas sbyor drug skor gyi chos bka' cha tshang | naigu'i zab chos kyi skor rnams zhus nas 'di skor sbyor drug 'phrul 'khor 'gab mar lo gcig bzhugs | thub bstan dge legs rgya mtsho'i zhal snga nas | lam rim | spyod 'jug | sdom gsum | sbyor drug spyi don rnams kyi bshad khrid dang | ngag dbang tshogs gnyis rgya mtsho'i mdun du | dus 'khor yongs rdzogs kyi khrid | nyid kyis mdzad pa'i gzhan stong mthar 'dzin gdung 'phrog gi bshad khrid | mthong don | sgom rim rnams kyi bshad khrid gsan sbyang legs par mdzad cing | dgung lo sum cu skor sogs su kun dga' mkhas grub dbang phyug gi mdun nas rgyal ba'i bka' chos las mdo 'dul gnyis kyi bklag lung dang | bla ma mnyam nyid kyi drung nas | rdo rje 'jigs mdzad rwa yi rnam bshad bcas dang | gzhan bskyed rim ci rigs pa'i khrid mang po gsan |
dgung lo zhe drug tu rdo'i shug chung du byon nas brag dkar sprul pa'i sku'i mdun nas | gsung dbyangs drug 'gyur gyis bka' 'gyur yongs su rdzogs pa'i bklag lung legs zhus mdzad la | nyid dgung lo so lnga skor nas sku tshe'i mtha'i bar lo re re bzhin wa shul grong sde'i mi skya pho mo rnams bsnyen gnas cha brgyad sogs kyi sdom lung 'bog pa'i 'gro don dus dus su mdzad pa ste | dam pa 'di dgung lo zhe bdun steng ngag dbang tshogs gnyis rgya mtsho dang | khong rnam gnyis lha bzo'i gdan sa 'dir rdo rje slob dpon du der gnas mchog dman yongs kyis re 'dun zhus pa yin na'ang dam pa 'di nyid kyis sgos su thugs khur bzhes te bla ma'i gdan sa sgrub gnas su nges don sgrub brgyud kyi bstan pa legs spel mdzad de chos rgyun ring du gnas par byas pa'i tshul yang thog mar sbyor drug chos tshan pa bla ma chos blo sogs sgrub po bzhi la zab lam yan lag drug gi zab khrid dbang bka' bcas cha tshang | gzhan yang 'don cha sna tshogs kyi bklag lung | de bar bskyed rim ci rigs pa'i khrid sogs legs gnang mdzad | 'di'i sku ring la lo dus bzhin gyi dbyar gnas kyang yod |