[A:414] blo rnon du 'dug kyang da dung bstan pa la thos bsam 'di tsam gyis chog par ma byed cig | ces gsungs te rgya nag ri bo rtse lngar phebs song ba phyis su 'ja' lus su song skad | rkyen des thos bsam phyogs re bas mi tshim par mdo sngags kyi gzhung lugs la sgo gang thad nas sbyang brtson mthar phyin par legs mdzad kyi tshul de lta bu'i sgo nas mdo sngags la mkhas gnas thob cing de dag gi lam nyams len la'ang rim pas myong ba khyad par ba dang bcas mthar nyid kyi spun tha chung rang yul nas 'bod mir byung tshe khong gi zhal nas | mdang mnal lam du rol mo zhig bkrol bar chas pa 'phral shubs su bcug pa rmis pas kho bo da lan rang yul du 'ong ba las 'di phyogs su 'gro don che tshul gsungs kyang | gang ltar rang yul du phebs dgos byung |
de nas dgung lo nyer gcig skor du thog mar 'dzam thang gtsang chen pho brang du rdo rje 'chang ngag dbang chos 'phel rgya mtsho'i sku drung du phebs te chos kyi sgo | rdo rje 'chang dbang | rdor sems bzlas lung | lhan skyes bzlas lung | grub rgyal lugs kyi tshe dbang | kun rig sa lugs kyi dbang | mi 'khrungs pa'i dbang | 'jam dbyangs dmar ser sa lugs kyi rjes gnang | brgyad stong pa'i bklag lung | dpal dus kyi 'khor lo'i mchog gi dbang gong ma bzhi po yongs rdzogs legs par gsan pa sogs gzhan yang chos bka' ci rigs mnos te thugs rgyud la byin rlabs kyi sgo phye nas byin chen legs 'phel kyi mdzad sgo rlabs che ba'i skal bzang thob | de nas re zhig gi tshe rdo rje 'chang chen po'i dgongs pa rdzogs rjes rgyal tshab nyid kyi khu bo bla ma chos 'phags kyis mdzad skabs gdung rten dus kyi 'khor lo'i blos bslangs bzhengs dus su'ang dam pa 'di nyid kyis las tshan gyi zhabs phyi sogs bgyid pa na chos 'phags nyid kyi dgongs bzhed ji bzhin dus 'khor blos bslangs kyi nyer mkho'i thig rtsa lag len sogs kyi gnad mtha' dag la myong bas rang byan tshud par gyur te | dgung lo nyer dgu'i skor tsam na khong gis gtsang pa'i rdo rje slob dpon ngag dbang chos 'byor sogs slob rigs pa 'ga' la rig pa'i gnas sna tshogs dang phung po lnga'i rab sbye'i rnam par bshad pa'ang mdzad |
dgung lo so gnyis skor du 'dzam thang gtsang chen pho brang du ngag dbang chos kyi 'phags pa'i zhal snga nas | dpal dus kyi 'khor lo'i bskyed rdzogs kyi zab khrid mthong ba don ldan gyi khrid yig rtsa ba dang | lhan thabs 'od brgya 'bar ba dang | zung 'jug rab gsal gnyis 'grel bshad du byas pa'i sgo nas thun mong sngon 'gro'i rim pa dang thun mong ma yin pa'i bskyed rdzogs kyi zab gnad mtha' dag rgyud don dang mthun par slob bu dag gis nyams su len shes nges kyi tshul du thos bsam gyis sgro 'dogs legs par bcad de zab don gtan 'bebs mchog tu gsam sbyang khyad par mdzad | gzhan yang dam pa gang nyid kyi drung du | phyogs rgyal gyi sbyor drug thog mtha' bar dge | lo chen rarna bha