[A:457] nyams len gnad smin dang | de nas sdom lung dang zab dbang gi chos bka' legs par gsan te mtshan yang ngag dbang bstan 'dzin grags pa zhes gsol |
de nas rim par bla ma gang nyid la rdzogs rim rnams legs par zhu ba'i sgo nas de dus kyi dam pa gong ma'i phyag bzhes bzhin rnal 'byor yan lag drug ga la nyams len gnad du khel zhing kha chos tsam gyi phyi tshul kho nar ma song bar bla mas ji skad gdams pa ltar sgrub pa lhur len gyi brtson pa gzhan phal pa gang dang 'gran du med pa lta bu'i shugs kyis 'bad pa byas pas grub 'bras la lam gang dag gi nyams myong yang lam rang rang gi thad du gzhan phal las 'phags pa'i myong rtags khyad par ba ci rigs nges par byung ba'i tshod du gor ma chag kyang yin lugs ji bzhin gyi khungs ma rnyed pas 'dir 'bri bar rngo ma thogs la | de skabs kun tu lha ba rdo rje 'chang gi drung nas sbyor drug gi chos skor mkho 'os gang 'tsham mtha' dag ma thob pa med pa lta bu byung zhing | de nas bzung dus snga phyi ci rigs rnams su lha bzo bla ma ngag dbang chos 'dzin zhabs dang | sbyangs pa bla ma kun dga' nges don | 'dzam ngos bla ma 'jam dbyangs rnams kyang dge ba'i bshes gnyen mchog tu legs bkur gyi sgo nas dam pa de dag gang yang rung ba'i zhal snga nas zab chos kyi dbang bka' sgrub thabs rin 'byung | rgyud sde rab 'byams yongs rdzogs | rdo rje 'phreng ba sogs zab bka' spyir yang ches mang nod rigs su 'dug cing | gzhan yang bshes gnyen du ma'i mdun nas kun mkhyen dol po'i bka' 'bum bklag lung sogs lung gi chos bka' mang po dang | khyad par sbyangs pa bla ma kun dga' nges don gang drung nas sbyor drug gi zab khrid yongs rdzogs zhus nas sgrub khang du lo gcig la nyams len gzab ldan kyang mdzad cing | dus snga phyi ci rigs par sbyangs pa bla ma gang nyid kyi drung du | dge 'dun grangs tshang bcas kyi sgo nas tshigs snga ma dge tshul dang phyi ma dge slong gi sdom rim pas legs par mnos shing bsnyen par rdzogs pa dge slong gi dngos po bdag gir bzhes te sku tshe gang por btsun pa rab kyi mthar thug pa'i bslab pa pha mthar phyin pa zhig tu gyur la | khyad par khong nyid dgung lo nyer brgyad skor du bla ma gang nyid kyi drung du 'dus pa ches mang dang lhan cig rdo rje'i phur pa'i stod las byang chub sgrub pa dang | smad las dgra bgegs bsgral ba'i las tshogs zung gi dbang bka' dkar bdud rjes gnang bcas dang | phur pa'i stod las kyi dmigs khrid dpal chen thugs kyi thig le dang | smad las kyi dmigs rim sbas pa mig 'byed gnyis kyi zab khrid zhib rgyas su legs par gsan zhing spyir dam pa 'di'i yi dam sgrol ma yin pas de lugs kyi bsnyen sgrub kyang gnad smin snga phyi ci rigs su legs par mdzad la | gtso bor 'dzam ngos bla ma 'jam dbyangs kyi drung yin nam snyam ste | bskyed rim yang | 'byung 'dul | rta mgrin | 'jigs byed | mgon po brag rdzong ma sogs yi dam gyi lha bsnyen mang po zhig dbang khrid zhus te | rang rang so so'i