[A:456] bka' bkod la brten nas rang yul dgon gyi sgrub brgyud kyi bstan pa'i rgyun 'dzin spel mdzad dgos tshul byung skabs dgon de'i sbyor drug gi chos tshan snga phyi ci rigs pa gong ma'i phyag bzhes bzhin gyi chos bka' dbang lung zab khrid gang dgos kyis legs bskyang mdzad pa ste | de yang bla ma dam pa gsal bzang gi sku dus lo gsum gyi ring la sbyor drug pa sogs sgrub sde ba dag la bla ma gsal bzang nyid kyis chos khrid gtsor mdzad dang de nas dam pa 'dis kyang chos bka' gang dgos dag la de lugs kyi khrid lung sogs gsal 'debs kyi tshul du mdzad la | bla ma dam pa gsal bzang sku gshegs pa nas bzung lo bdun tsam la nye bar khong nyid nas thugs khur bzhes te bya yur dgon gyi chos sde gang dag la dbang lung khrid sogs ci dgos kyis re 'dod ji bzhin skong bar mdzad bzhin rdo rje slob dpon gyi go gnas legs bzung gi tshul du sgrub brgyud spel ba'i dge ba'i bshes su gong smos ltar gyi lo grangs kyi bar la ji bzhin nye bar bzhugs pa yin na'ang bar skabs snyigs dus kyi rang mtshang bstan te dus kyi 'gyur ldog chen po mthu shugs bzod par dka' ba sngon bsags ngan pa'i 'gro ba bsod nams zad pa gang dag gi spyi mthun las mthu btsan po las byung ste shin tu bzlog dka'i tshul du rnam par smin pa 'gro ba rang cag gi bgo skal du gyur pa'i dbang gis dam pa gang 'di yang rgyal spyi'i mnga' 'og gi char gtogs 'dzam thang rdzong gi rtsa 'dzugs 'dzi ka'i na thang du byas yod pa'i dus kyi khri mun du lo gcig la nye ba tsam sku tshe'i mtha' la 'o brgyal mdzad dgos byung ba'i rkyen gyis sku la bsnyung nad kyis zin te rab byung bcu drug pa'i nang tshan lcags byi'i lo mjug tsam na rang gnas dgon par phebs te sku gshegs pa na dgongs mchod sogs dus dang bstun pa tsam las cher rgyas kyi skal ba ma byung ngo | |
bla ma ngag dbang bstan 'dzin grags pa |
16. da ni gtsang chen sku phreng gsum pa nyid kyi thugs slob gtsang pa dge slong dang | de'i dngos slob lha ba bla ma kun dga' dpal ldan dang | de'i thugs sras su gyur pa dge skor bla ma ngag dbang bstan 'dzin grags pa ste | gang gi lo rgyus mdo tsam 'dir 'chad pa'i skabs su babs pa la dam pa 'di'i 'khrungs yul 'dzi smad nyin gyi char gtogs ra 'ob ces pa'i yul grong gi sde der dmu tsha rga rigs las byung ba yab dge skor tshe dbang dang yum lha tshe za gnyis kyi sras su lcags sprel lor sku 'khrungs | de nas cher bskyed de re zhig na klog legs bslab kyis ser gral du tshud nges byas pa nas bzung cung sku na son tsam gyi dus su dam pa'i chos dang mjal ba'i dbu brnyes te 'dzam thang gtsang pa'i gzims khang pho brang du sngags kyi rdo rje 'dzin pa chen po lha ba bla ma kun dga' dpal ldan zhabs pa'i mdun du phyin te | dam pa gang nyid zab chos zhu yul gyi dge ba'i bshes gnyen rdo rje 'chang chen por gus pas legs bkur byas nas rdo rje'i rnal 'byor ba yan drug gi sngon 'gro'i rim pa legs zhus kyis