[A:462] dbang khyad par can | bdag po | bdag chen dang bcas rdzogs par legs zhu mdzad skabs gter chen mchog gi thugs snang ngor | dpal ldan bla ma dam pa gang nyid kyi sku la rgyun du stong gzugs lha sku yab yum mtha' klas pas khrig mer gyis gang ba mthong zhing | bar 'ga' mkha' dbyings nas rdo rje phag mos bde chen dga' ba'i gar gyis 'khyud stabs re mdzad pa'i tshe bla ma dam pa'i spyan gyi lta stangs gtad pa na rdo rje phag mo'i sku'i snang ba dpag tshad brgal ba'i pha rol chos kyi dbyings dang dbyer med ro mnyam du song nas gnas lugs bde ba mchog gi gshis cher ngom mdzad pa'i dag snang yang byung zhing | de'i mthar gter ston khong nyid kyis kyang gzims khang bla grwa yongs la gu ru drag po ye shes rab tu 'bar ba'i zab dbang zhib rgyas su legs gnang mdzad pas dbang yon maNDala gyi skyes 'degs rgya che bas bkur sti legs nges kyang mdzad | sngon dam pa gang nyid kyis a skyong bla ma 'das skabs rnam shes lha'i rnam par 'ong ba gsal bar gzigs shing | dus phyis su khang lung gi gnas bdag dge slong gi gzugs su mngon par mthong ba sogs lkog gyur gyi gnas ji bzhin mkhyen pa'i thugs mngon rab tu rgyas pa dang | sku tshe smad 'di skor rnams su khong nyid kyi thugs snang ngor rang lus dag pa sgyu ma'i lha sku stong gzugs dus kyi 'khor lo'i rnam par shar te mnyam rjes thams cad du stong gzugs dag snang rab 'byams kyi dus 'da' ba'ang byung | slob tshogs la bar bar du sbyor dngos rjes gsum gyis rang sems legs 'dul byed dgos tshul | de min gzugs brnyan tsam gyi dge bas go mi chod tshul | nyams su mi len pa'i dpe sbyang slob gnyer gtsor byed la don mgo nges par chung tshul sogs zhal gdams kyi gnad kyang mang po gsungs so | |
da ni dam pa gang des bya ba las kyi 'khor lo'i mdzad sgo yang 'dir phyogs tsam bsdu na sngon a skyong bla ma 'das pa'i dgongs rdzogs kyi tshul du dgon pa la khar khang brtsegs kyi mchod rten rgya che bkod legs pa sangs rgyas kyi ring bsrel 'khrul med zung 'jug tu yod pa de'i nang ngos gyang ris su sbyor drug brgyud pa'i bla brgyud cha tshang | yi dam rgyud sde'i lha tshogs ches mang | dpag bsam 'khri shing cho 'phrul gyi mdzad bkod bcas | ri mo bzang zhing spus legs rab gnas dga' ston mtha' rgyas yogs su rdzogs pa'ang dam pa 'dis sbyin bdag yon 'bul byas pa'i stobs las nges par byung zhing | nyid kyi pho brang nang du mchod khang ka gnyis mar khong nas legs bzhebgs mdzad pa kun dga' ra ba legs mdzes pad 'dab bla re bcas pa'i nang du'ang rje btsun byams mgon sogs gser sku bcu gsum | sman sku dus gsum sangs rgyas | kun mkhyen chen po'i 'dra sku che chung mang po rnams bzhugs shing | mchod khang du bkram rgyu'i thang sku yang | kun mkhyen yab sras | rje btsun sku skyes | thub pa gnas brtan bcas dang | dus 'khor nus ma gshegs pa yab yum bcas dang | rgyud sde lnga po'i gtso