[A:482] shug ca dge legs la dad mos kyis rmi lam skabs rje bla ma gang gi sku dang gsung gi snang ba sogs nyid kyi thugs sras slob chen dag la 'gran zla dang bral ba'i byin rlabs kyi legs mtshan de lugs ltar ches mang tshod du 'dug cing bstan 'gro la rlabs chen gyi mdzad 'phrin de bzhin te chos nyung tsam 'dir smos par zad kyi cung rgyas tsam yang spro ba'i blo nas kun na yongs su bral ba lags pas gang nyid kyi yon tan mchog tu rgyas pa'i gsang ba 'byams klas pa ni bsam gyis mi khyab pa'i yul kho na'o | |
ngag dbang tshogs gnyis rgya mtsho |
19. gtsang chen sku phreng gsum pa'i thugs sras gtsang pa dge slong gi dngos slob rnal 'byor gyi dbang phyug ngag dbang chos 'dzin zhabs pa'i rdo rje'i slob ma bstan 'gro'i dpal du gyur pa bdag la yang dag chos tshul legs par 'doms pa'i bshes gnyen 'dren mchog chos kyi rgyal po lung rigs smra ba yongs kyi gtsug rgyan ngag dbang tshogs gnyis rgya mtsho gang nyid kyi gsang gsum yon tan nam mkha' dang mnyam pa las ches nyung sa bon gyi cha khab kyi bu gar shong ba dpe zlar 'os tsam zhig 'di na spro ba dus su babs pa ste | de yang 'dzi nyin smad kyi sa yi thig le'i char gyur pa'i grong sde rab kha zhes par a lcags 'bri'i brgyud pa a skyong rgyal mtshan gyi bu seng ge thar gyi rigs rus las byung ba yab mgo log bkra tshe dang yum bser za lab sgron gnyis kyi sras su rab byung bco lnga pa'i nang tshan lcags pho 'brug gi lor sku zla gzhon gsar pa'i myu gu dus su legs par 'khrungs te phan bde'i 'od dkar gyi snang ba'i cha phra ba'ang tshul lugs de'i rjes su shugs la | sku na bskyed skabs chung dus nas mkhyen rab kyi rtsal gzhan phal pa las lhag par che zhing dgung ko brgyad dgu'i skabs klog legs par bslab pas klog 'don mkhas pa'i rtser son par gyur |
dgung lo bcu bzhi skor sogs nas bkra shis lha ri'i dben gnas su lha bzo rdo rje 'chang chen po ngag dbang chos 'dzin dpal bzang po bzhugs pa'i drung du dus kyi 'khor lo'i zab lam sbyor ba yan lag drug gi sngon 'gro rnams dang bar ma rab byung gi sdom pa legs nod skabs kyi mtshan ngag dbang tshogs gnyis rgya mtsho zhes gsol ba yin zhing | de nas rim pas rje bla ma'i drung nas smin byed mchog dang bcas nyer bsdogs dben gsum nas bzung dngos gzhi yan lag drug gi khrid rnams zhus te khong ma'i phyag srol ltar nyams bzhes mdzad skabs lam rang rang gi myong rtags spyi dang khyad par du rang gi rdo rje'i lus kyi rtsa 'khor drug tu stong gzugs rgyal ba rigs drug gi dkyil 'khor 'od zer 'du 'phros rnam par rol pa bcas rlung sems thig le'i chos nyid du mos blos btang ba la ma ltos par 'dzin med rang shar gyi tshul du sgrib med mkha' yi skor tshogs dbang yul du mthong ba bzhin ches gsal yang phyi rol don gyi rnam pa ltar ma yin par nang rang sems 'od gsal ba'i gshis su ji bzhin mthong ba bar bar du