[A:485] ba'i sku drin can | | bshes gnyen thugs rje khyed yud tsam dgongs | | zhes gsungs pa lta bu'i bka' drin nyid thugs su legs par chub pa'i phyir ro | |
rje bla ma'i drung du khong gis slob gnyer gyi skabs su bar 'ga' zhig la bstan bsrung nag po chen po ye shes kyi spyan ldan gur gyi mgon pos rang zhal bstan te chos bzhin sgrub pa la sdong grogs mdzad pa'i g.yar dam yang nges pa byas zhes grags skad | rje bla ma bzhugs dus su slob bu 'di nyid kyis gzhan la chos gang 'chad dgos kyang thugs spobs pa mchog tu rgyas pa'i sgo nas gzhung lugs gang gi don la'ang thogs pa med par ji bzhin gzhan la shod thub cing mthar yang rje bla ma mchog gi zhal nas da ni slob bu rigs pa 'di la chos bshad rgyu yang byung | 'dis brtson pas ched gnyer nan tan lhur blangs pas gzhan las rig pa'i gnas la ches mkhas tshul sogs thugs dgongs rdzogs pa dang bsngags brjod kyi gtam yang bar bar du gsung la | de ltar gyis lo 'gar song rjes dpal ldan bla ma 'jam pa'i dbyangs dngos dag zhing du gzigs pa nas bzung rjes kyi slob tshogs gang yod phan tshun gyis re 'dun lhag par che ba'i dga' spro'i ngang nas gus zhu ltar | dam pa 'di nyid kyis bkra shis sgang gi bla ma rab ldan dang | ka thog mkhyen ldan sogs la bsdus grwa'i bshad khrid sogs chos bka' ci rigs lo 'ga' zhig gi ring du zhib rgyas su legs gnang mdzad |
nyid dgung lo nyer dgu'i skor dpal gyi 'dzam thang du gtsang pa'i rdo rje slob dpon ngag dbang chos 'byor zhabs pa'i mdun nas | khong gis sgrol ma rnal 'byor ma'i rgyud 'grel rje btsun tAranAthas mdzad pa'i bklag lung dang | rje dge legs rgya mtshos mdzad pa'i dus 'khor yongs rdzogs kyi khrid lung | rdo rje 'phreng ba'i dbang chog dang | mgon po'i las tshogs kyi po ti me 'bar dang | 'jigs byed las tshogs rwa bde gsum gyi bklag lung rnams gsan |
dgung lo sum cu'i nang zhig nas khong nyid 'dzam thang gtsang pa'i gzims khang du phal che bar bzhugs te 'di skor khong gi mdun du thos bsam gyi slob gnyer ba | a mgon bla ma | 'dzi sribs bla ma rin bzang | phyug skor bla ma chos dbang | bla ma blos tshul | bla ma legs byams | rnga ba'i dge slong 'jam dbyangs sbyin pa dang | dge slong shes rab dpal bzang sogs snga phyir bla grwa mang po'i chos tshan so so la | bsdus grwa | phar phyin | mngon pa | dus 'khor rgyud 'grel | phyag 'tshal bstan pa spyi 'grel gyi 'grel bshad sogs chos bka' mang po lo dus bzhin gnang la | de skabs dgung lo sum cu so gnyis sogs nas so lnga'i bar la rim par rab kha'i bla ma kun dga' mkhas grub dbang po'i mdun nas sbyong rgyud bcu gnyis | dus 'khor dbang chen | rje btsun tAranAtha'i bka' 'bum gyi bklag lung rnams nyid kyis 'dzam thang du gsam zhing | mgo log yar thang du bla ma de nyid drung du khong gis phyag len bcas kyi