[A:513] drug gi sngon 'gro'i chos khrid legs zhus nyams len dang dbang sdom pa sogs kyi dus su mtshan ngag dbang gsang sngags rgya mtsho zhes pa gsol zhing de nas rim par dam pa gong ma'i phyag srol dang mthun par lo gsum gyi ring rdzogs rim yan lag drug lus sbyor 'khrul 'khor thig le'i 'khrul 'khor sbyor drug stan thog gcig ma zab lam 'pho ba'i nyams len bcas ji bzhin dus bstan gyi nyan sems sgom pa lag len dang bcas legs grub mdzad cing | de dag gi skabs su rje bla ma nyid kyi mdun nas dam pa 'di la gzhi khog sbyor drug gi chos bka' ci dgos dang rgyud sde rab 'byams kyi dbang bka' mang po dang | rje btsun gsung 'bum sogs kyi bklag lung la sogs pa chos bka' ches mang thob la de mtshams shig nas rje bla ma nyid 'phral du dag zhing du gzigs rkyen 'dzam ngos bla ma kun dga' ngag gi dbang po gang nyid kyis dam pa 'di sogs la sbyor drug dbang lung khrid gsum gang dgos stsal te chos mjug yongs rdzogs kyi bar de lugs ltar byas shing | de nas dam pa 'dis kyang mtshams snga phyi ci rigs par kun dga' ngag gi dbang po'i drung nas bskyed rim re dang chos khrid gzhan 'ga' re zhus shing de mthun bsnyen mtshams dang slob gnyer re'ang mdzad dam snyam mo | |
de rjes mi ring ba'i lo dus shig na ngag dbang tshogs gnyis rgya mtsho ra 'ob shug khrod sogs su bzhugs skabs gang nyid kyi drung du song ste | bsdus grwa | phar phyin | dbu ma | mngon pa sogs bka' pod rnams dang sngags kyi rnam bshad ci rigs dang bcas mdo dang sngags kyi gzhung lugs la sbyang ba ched gnyer gyis mkhas pa'i phul du son zhing | de ltar lo du ma'i ring dam pa 'di 'dzi yul gyi skyes chen mchog rnams bzhugs drung du dam chos 'tshol ba dang chos la thos bsam sgom gsum gyi ched yun ring po zhig tu legs par bzhugs tshod du 'dug | de rjes rang yul phyogs su khong nyid lo 'gar mtshams bsnyen re dang mdo sngags kyi gzhung lugs la thos bsam dpe gzigs kyis rtog zhib la nan tan rgya che ba dang bcas kyis snga phyi lo du ma zhig 'das song zhing de mtshams bar bar du khong gis chos sde 'ga' la dge 'dun gyi bslab pa yongs su sbyong ba'i mkhan po mdzad de chos khrid kyang 'dul gzhung sogs gang mkho'i chos bka' ci rigs pa 'chad cing | 'di skor du khong la mkhan po'i mtshan chags shing de nas re zhig gi tshe nyid kyis slob gnyer ba rgyun bzhugs 'ga' zhig la | bsdus grwa | phar phyin | dbu ma sogs mdo sngags gang gi gzhung lugs mkho ba dag la de mthun chos kyi bshad khrid ci dgos kyang mdzad bzhin rang gi nye 'khor du chos slob pa'i grwa btsun 'ga' re mi chad pa lta bu'i dus rgyun 'chad nyan la gzhol bar mdzad ngos nas dus re zhig gi tshe chos sgar che ba'i mnga' bdag skyabs mchog smon lam bzang po dang gong ma'i dpon sogs kyi bka' bkod la brten nas dam pa 'di nyid chos sgar che ba'i khrod du phebs dgos byung zhing der nyid kyis lo shas ring klad bla ma rje dam pa mchog la thugs slob