[A:526] len sogs chos bka' mang po zhig legs gsan mdzad |
de rjes mi ring ba na grub dbang bde mchog pa nyid kyis a mchog rin po ches rje btsun gyi bka' 'bum las chos bka' ci rigs pa legs 'bul grub rjes tsam na a mchog khong nyid byang bla brang dgon du phebs skabs shig la dgung grangs zhe lnga'i steng nas 'phral du gzugs sku chos dbyings su nyer thim byas rkyen sngar gyi thugs bzhed dang mdzad sgo ji bzhin 'grub pa'i skal ba ma byung stabs rje bla ma dam pa 'brog dge yon tan rgya mtsho gang gis rang re'i bstan la thugs bskyed rgya che bas 'dzam thang nas gtsang pa dge slong ngag dbang chos 'phel nyid thugs sras ngag dbang nor bzang dang chos kyi 'phags pa sogs dpon slob mang tsam zhig gdan 'dren mdzad de 'brog dge dgon dpal tshes kha bsam 'grub gling du dpon slob lhan rgyas gyi ngang nas gtsang pa dge slong gi mdun nas bla ma dam pa yon tan rgya mtsho 'khor dang bcas kyis rje btsun bka' 'bum yongs rdzogs kyi dbang lung mtha' dag gsan zhing khyad par sbyor ba yan lag drug gi zab khrid man ngag gi rim pa bla ma gong ma'i phyag bzhes bzhin gsan sgom khyad par ba mdzad la | thugs sras bla ma nor bzang zhabs pa'i drung nas kyang de lhag gi dbang lung phran bu re dang | shangs chos skor gyi dbang lung zab khrid mtha' dag legs gsan gyi sgo nas nyams bzhes lhur blang gis grub 'bras dus su smin nges byas te snga phyi lo du ma'i ring myong rtags rang lugs kyi ting nge 'dzin khyad par ba'i g.yo thob goms pa mthar phyin pa'i ngang nas stong gzugs phyag rgya chen mo rnam pa kun dang ldan pa'i rang gshis gsal stong 'dzin pa bral bar mjal tshabs che ba sogs nyams myong thun mong ma yin pa thugs nyams su legs 'khrungs kyis sgom pa mchog gi klong du gyur to | |
de nas re zhig gi tshe sngon 'brog dge kun dga' lhun grub nas bzung bla rabs lnga drug tsam byung bar mngon la rtsi nang dgon gyi zhal bdag mdzad mkhan gong smos ltar de dag gis rang tshod re yang byas pa yin pas 'dir yang de lugs ltar gyis rje bla ma 'brog dge yon tan rgya mtsho khong nyid la lcags rtsi mda' gnyis kyi mi dpon dag gis rtsi nang dgon zhal bdag gi mgo 'dren legs mdzad dgos tshul gyi zhu ba nan cher phul ngos nas rje bla ma gang nyid kyis thugs bskyed de ltar legs bzhes mchog gi ngang nas rtsi nang dgon du 'dus sde'i 'tshogs khang gsar bzhengs kyi nang du rgyud sde de nyid lnga pa'i rdul tshon la brten pa'i sgrub mchod dang | de nas rim pa bzhin dus 'khor dang | thams cad rig pa'i sgrub mchod rdul tshon can | lo bstar gyi cho 'phrul smon lam chen mo sogs dus mchod du ma'i 'tshogs grwa legs 'dzugs mdzad cing | yang dag 'grig khrims kyi bca' yig legs bkod kyi sgo nas dgon de'i ming la dpal mi 'gyur nges don bde chen gling zhes btags nas der rang lugs nges don gyi chos grwa ring du bskyangs te bstan 'gro la phan pa rlabs chen kyang mdzad |