[A:554] ba'i chos tshul mtha' yas pa'i mdzod nyag ma gcig gi bdag nyid du rnam par nges pas na gnas lugs don gyi dang po'i sangs rgyas nyid du'ang legs par grub pa nyid kyi phyir | dus gsum du mngon par byon pa'i dpal ldan bla ma thams cad kyi don dam chos sku dang po'i sangs rgyas de 'dra ba gang nyid ni 'bras bu mngon gyur gyi skabs ma zad gzhi'i dus su dri bcas sems kyi gshis lugs de bzhin nyid du nges par bzhugs pa yin te | rgyal ba bcom ldan 'das thams cad gzigs pa dpal heruka nyid kyi dpal gyi mgur nad ched du bya ba'i skal ba ches rab kyi 'khor dpa' bo dang rnal 'byor ma 'byams klas pa'i dbus su gzhi sems can gyi gnas skabs dri bcas sems glo bur ba'i rang gshis gnas lugs kyi tshul du don dam sangs rgyas dngos bzhugs gzhi dang 'bras bu dbyer med kyi rnams pa ji bzhin gab sbas med par rdo rje'i tshig gis yang yang gsal brjod du bka' nges par stsal ba'ang dpal brtag gnyis kyi rgyud las | 'jigs rten khams ni gang du yang | | sangs rgyas gzhan du rnyed 'gyur | | sems ni rdzogs pa'i sangs rgyas nyid | | sangs rgyas gzhan du bstan pa med | | ces dang | de bzhin du sam bhu Ti'i rgyud las kyang | rang gi lus la sangs rgyas bzhugs | | gzhan du gang na sangs rgyas med | | mi shes mun pas bsgribs pa rnams | | lus las gzhan du sangs rgyas 'odod | | ces gsungs shing | de dag dang mthun par rgyud kyi rgyal po las nges par gsungs pa'ang | sems can rnams ni sangs rgyas nyid de chen po'i sangs rgyas gzhan ni 'jig rten dag na yod ma yin | | zhes pa la sogs pa de 'dra ches mang ba nyid kyi phyir dang | tshul de dang mthun par dgongs pa legs par gsal mdzad kyi grub pa'i dbang phyug bir ba pas kyang bcom ldan 'das rgyal ba mchog de nyid kyi dgongs pa ji bzin legs par bkral ba ma zad gzhan grub dbang du mas zhal mthun par yang tshul de ka kho na ltar mdzad pa ste | de yang thog mar grub chen bir ba pas | rang gi lus la sangs rgyas bzhugs | | gzhan du gang na sangs rgyas med | | sangs rgyas rnams kyi ye shes sku | | gzhan du btsal bas rnyed mi 'gyur | | zhes dang | sa ra has de mthun du | mkhas pa bstan bcos 'chad pa thams cad kyis | | lus la sangs rgyas yod par mi rtogs so | | de ltar rtogs na gang du'ang 'gro ba med | | mkhas pa ngo tsha med pas de ma rtogs | | zhes dang | de bzhin du pha dam pa rgya gar gyis | mya ngan 'das chung du rdzogs pa'i sangs rgyas dang gtan du 'grogs kyang rgyus med pa mang po cig gda' 'o | | zhes dang | ma cig lab sgron mchog gi zhal snga nas kyang | ye nas sangs rgyas yin par ma rtogs par | | sangs rgyas gsar bu res kyang mi 'ong nas | | zhes sogs nges don zab gsang gi gnad ji bzhin gsungs pa ltar rang re'i bla ma rje rgyal ba gnyis pa jo nang pa chen po gang nyid kyis gangs ljongs su de 'dra'i srol legs phye mdzad pa'an | nyid kyi zhal nas | gzhi la bzhugs pa