[A:563] dpal ji lta ba dang | dus kyi 'khor lor dang po'i sangs rgyas ji lta ba bzhin du | thar pa don du gnyer ba rnams kyis blta bar byao | | zhes gsungs pa ltar bla ma la mos gus dag snang rgya che ba 'di byin rlabs ma lus pa'i rtsa ba yin zhing mdo sngags gang gi skabs la lam thams cad kyi thog ma'i 'jug sgo nyag gcig tu gyur pa kun nas med mi rung ba'i gal bo che chos kyi rtsa ba gcig chog ma yin nges su 'dug pas de 'dra ni gang la rag las na lam sgrub po gang dag gis rang rang gi rtsa ba'i bla ma'i bar gyi zab chos gdams pa'i mdzod 'dzin pa'i skyes chen gong ma rim byon rnams gong nas gong du phug ded de rang re'i nges don sgrub brgyud gtso bor gyur pa'i lung dang rtogs pa rdzogs ldan chos mchog gi lugs srol bzang po de nyid kyi khungs bod dang 'phags yul gyi lo paN yongs su grags pa spyi dang khyad par 'dzam gling mdzes rgyan thogs med sku mched rjes 'brang bcas dang | shambhala'i 'phags pa rig gsum mgon po'i rnam par 'phrul ba'i chos kyi rgyal po gang dag dang | rgyal tshab mi pham pa dang ston pa mchog bstan pa'i bdag po gang nyid kyi bar chu mgo gangs la thug pa lta bu'i chos brgyud ches bzang zhing khungs nye bar btsun pa'i lo rgyus kyi rnam par thar pa ji bzhin shes pa la bslu med du rag las yod par mthong bas na de ltar gyi rnam par thar pa legs brjod kyi phan yon yang tshul de dag la brten nas dam chos mtha' dag gi thog ma'i sgo legs par dod pa'i lus can gang dag la gnas skabs dang mthar thug gi dgos don ma lus pa rim pas bde blag tu 'grub 'ong nges su tshad mas thag chod de som nyi'i go skabs kun nas bral bar gyur to | |
(2) bla ma ji ltar bsten pa'i tshul |
de yang spyir na gang bsten par bya ba'i bla ma'i mtshan nyid dang gang gis par byed mkhan slob ma'i mtsham nyid ji lta bu zhig dgos zhe na | de yang bshad par bya ste | thun mong rgyu'i theg pa'i skabs su lam slob pa gang dag gis gus pas bsten bya bla ma dge ba'i bshes gnyen gyi mtshan nyid sde snod so so las gsungs tshul du ma yod kyang 'dir mdo sde rgyan las gsungs pa ltar te | ji skad du | bshes gnyen dul ba zhi ba nyer zhi ba | | yon tan lhag pa brtson bcas lung gis phyug | | de nyid rab tu rtogs pa smra mkhas ldan | | brtse ba'i bdag nyid skyo ba spangs la brten | | zhes pa ltar dge ba'i bshes gnyen chos bcu dang ldan pa zhig dgos pa yin la | de yang bshes gnyen de nyid rang rgyud legs par dul ba'i tshul khrims kyi bslab pa dang | nang sems yongs su zhi zhing yang dag pa'i dmigs pa la rtse gcig tu gnas pa'i zhi gnas kyi nyams len ting nge 'dzin gyi bslab pa dang | zhi gnas kyi dmigs pa'i don so sor nges shing gsal ba'i nye bar zhi ba lhag mthong gi char gtogs shes rab kyi bslab pa ste