[A:562] kyi slob dpon nyid dad gus kyis dran tsam la bsod nams mang du 'byung tshul gyi cha nas de slad du bla ma'i rnam thar la zhib 'dris byed dgos pa don gyis bstan tshul ye shes rgyal ba'i rgyud las | mtshan dang dpe byed ldan pa'i lha | | bskal pa stong du bsgom pa bas | | bla ma dran pa'i bsod nams che | | zhes dang | las dang po ba dag gis bla ma med par rdzogs rim bskal par sgom pa bas snying nas dad gus bcas kyis bla ma nyid sems dkyil du dar cig la shar tsam gyi phan yon 'bum phrag nyi shu'i char yang 'gran mi nus pa'i cha nas de slad du dam pa gang dag gi rnam thar 'dris brjod nye bar bya dgos tshul dkon mchog bkod pa'i rgyud las | rdzogs pa'i rim pa bskal pa'i bar du ni | | 'du 'dzi g.yeng ba spangs nas bsgom pa bas | | bla ma sems kyi dkyil du dar cig shar ba tsam | | 'bum phrag nyi shu'i char yang mi phod do | | ces dang | bla slob mtshan nyid dang ldan pa gang dag la dngos grub kyi sgo gang nas mi dman zhing yang dag gi 'jug lam khyad par ba nges par mi bslu ba'i cha nas bla ma gang dag gi rnam thar brjod pa dang de la brten nas bla ma dam pa mchog nyid la yon tan gang mthong gi cha nas dad gus dag snang rgya che ba'i sgo nas slob dpon gyi sku mthong ba tsam la'ang dga' ston dpag med bskyed dgos pa'i tshul 'jam dpal rtsa rgyud du'ang | slob dpon slob ma mtshan nyid ldan | | slob mas slob dpon mthong bar spro | | de lta bu yis rtag tu ni | | dngos grub yang dag 'byor ba nyid | | ces pa la sogs phan yon gyi sgo rgya cher gsungs shing | de 'dra'i bla ma rdo rje slob dpon gang nyid deng dus su 'gro don la legs par byon pa rnams ni don gyi yin lugs su ye gzhi chos sku'i rang gzugs dpal ldan khyab bdag rdo rje sems dpa' dngos kyi ngo bor bzhugs pa yin kyang snyigs dus kyi 'gro ba rang cag gis de 'dra dngos mthong ba'i skal ba med pas rang 'tsam dang mthun pa'i mi'i dge ba'i bshes gnyen mchog gi rnam pa tsam gyi thabs tshul khong gis gdul bya la ltos nas dgos dbang gis 'chang ba la bsam na bla ma gang dag gi gsang ba gsum gyi yon tan rgya mtsho dang 'dra ba las chu thigs kyi cha tsam yang rang lta bus ji bzhin brjod pa'i rngo ga la thogs te | rdo rje gur gyi rgyud las | | rdo rje sems dpa' ji lta bus | | de ltar slob dpon gzugs 'dzin te | | sems can rjes su gzung dmigs nas | | phal pa'i gzugs su gnas pa'o | | zhes gsungs pa ltar don gyi gnas tshod la gdod ma'i sangs rgyas dpal rdo rje sems dpa'i gsang gsum gyi cha phra ba'ang kun nas rnam pa thams cad pa'i bdag nyid yin pas de'i yin lugs ji bzhin brjod nus pa'i so skyes rang ga ba gang nas mi srid pa smos kyang ma dgos pa lta bu'i gnas su nges par gyur pa'i phyir |
de nas de lugs la dgongs te rje btsun spyan ras gzigs dbang phyug gis | dus 'khor 'grel chen dri med 'od du | dus kyi 'khor lo'i rgyud ston pa po rdo rje slob dpon ni bcom ldan 'das 'jam