[A:565] ma'i mtshan nyid mdo sngags la mi 'dra ba cher med kyang khyad par gyi sgo cung zad yod pa rnams 'dir smos na | rgyud las | sngags dang rgyud kyi sbyor ba shes | | snying brtse ldan zhing bstan bcos mkhas | | de nyid bcu ni yongs su shes | \ dkyil 'khor 'bri ba'i las la mkhas | | gsang sngags 'chad byed slob dpon te | | zhes gsungs pa ltar sngags kyi rdo rje slob dpon gang de ni rig sngags bzla ba dang | de'i lag len sna tshogs pa ni sngags kyi sbyor ba dang | sngags rgyud las bstan pa'i dngos grub sgrub pa'i thabs su las tshogs mi 'dra ba'i sgo ni rgyud kyi sbyor ba yin pas de 'dra'i sngags rgyud kyi sbyor ba ji bzhin shes pa dang | byams pa dang | snying rje ba'i brtse ba phun tshogs dang ldan pa dang | mdo dang sngags kyi bstan bcos kyi don la mkhas pa dang | de nyid bcu zhes pa la phyi'i de nyid dang | gsang ba'i de nyid brtsi lugs gnyis las | dang po phyi'i de nyid bcu ni | dkyil 'khor | ting nge 'dzin | phyag rgya | stangs stabs | 'dug stangs | bzlas brjod | sbyin sreg | mchod pa | las sbyor | slar bsdu rnams yin | gsang ba'i de nyid bcu ni | phyir bzlog gi cho ga gnyis dang | gsang ba dang | shes rab ye shes gnyis dang | kha sbyor dbyer ba'i cho ga dang | gtor ma'i bya ba dang | rdo rje'i bzlas pa dang | drag shul sgrub pa'i sbyor ba dang | rab tu gnas pa dang | dkyil 'khor sgrub pa rnams yin la | de rnams kyi tshul ji bzhin shes pa dang | dkyil 'khor 'bri ba'i las dang | sngags kyi dgongs don ji bzhin 'chad shes pa rnams sngags kyi slob dpon la ldan dgos shing | gsang chen theg pa'i slob dpon dang slob ma gnyis ka la mnyam du ldan dgos pa ni | rgyud las | brtan cing dul la blo gros ldan | | bsod ldan drang la g.yo sgyu med | | ces byung ba ltar tshul khrims brtan cing ma nyams pa | sems rgyud dul ba | chos kyi tshul so sor 'byed nus pa'i blo gros | chos kyi dka' spyad la bzod pa | rgyud drang por gnas pa | g.yo sgyus yon tan med kyang yod pa ltar dang skyon yod kyang med pa ltar byed pa de 'dra nam yang mi byed pa ste | yon tan de drug ni sngags kyi slob dpon slob ma gnyis kar med mi rung tshul gsungs pa sogs de lugs kyi rim pa sna tshogs pa mang na gtso bor slob dpon nyid la med mi rung ba ni | dad pa dang ldan pa | dam tshig ma nyams pa | bsnyen pa sogs kyis lha mnyes par byas pa | chos gang gis slob tshogs rjes su bzung na de lugs kyi chos de la mkhas pa rnams yin | slob ma la'ang med rung ba ni | dam tshig ji bzhin bsrung nus pa dang | sdig pa'i grogs po nges par spangs pa de yin no | |
de lta bu'i slob dpon dang slob ma gang dag phan tshun bsten pa dang bsten byed kyi 'brel ba yod phan chad slob dpon de nyid slob mas bsam sbyor gnyis kyi sgo nas gus pas legs bsten byed dgos shing | de yang dpon slob kyi 'brel la brtag pa yang chos kyis ma sbrel gong du bya dgos kyi | sngar brtag