[A:566] pa dang ma brtags pa gang yin kyang 'dra chos 'brel thob phan chad nas bla ma de'i skyon mi rtogs cing yon tan gyi phyogs kho na bzung ba'i sgo nas gus bsten legs par bya dgos te | mkhas grub chen po shanti pas mdzad pa'i dgra nag gi dka' 'grel du drangs pa las kyang | tshigs bcad gcig tsam mnyam pa la | | gang gis bla mar mi 'dzin pa | | khyi yi skye gnas brgyar skyes nas | | sme sha can du skye bar 'gyur | | zhes gsungs pa ltar yin pa'i phyir | de lta bas na bla ma gang yin kyang rung slob ma dag gis slob dpon du bsten pa'i tshe dper na bu mdzangs pas pha la bya ba ltar rang dbang dor nas rang nyid bla ma'i dbang du nges par gtong ba gal che zhing slob dpon de nyid la slob mas ma 'dres pa'i mdza' shes su blo rtse gcig pa nam yang mi phyed pa brtan pa'i rdo rje lta bu'i bsam pa dang bcas sdig grogs kyi dbang du rang nyid mi grong ba dang | bla ma slob dpon gyi bya ba thams cad slob ma des 'gan khur sems gting nas byas te bya ba ga 'dra la thug kyang sems mi skyo ba'i khur theg cing bsgul bskyod med pa'i sa lta bu'i sems tshugs bzung dgos pa dang | bla ma'i sku don du slob ma la sdug bsngal ci byung yang des slob ma'i sems la mi dga' bas g.yo 'gul med pa ri bo lta bu'i sems kyis gnas pa dang | bla ma la zhabs phyi g.yog bkol gyi bya ba 'jig rten khyim pa'i bran tha chad lta bus ngan las thams cad gus pas dang blang gi sgo nas skyes rtsal ci yod kyis 'bad pa dang | bla ma las rang dma' bar 'dzin pa'i sgo nas nga rgyal thams cad rnam par spangs te gnas pa dang | bla ma'i bya ba shin tu bya dka' ba'i khur lci ba rnams kyang spro bzhin du slob mas legs par 'dzin pa dang | bla mas brnyes shing gshe yang de la slob ma nyid mi khro zhing bdag po'i khyi lta bu'i ngang tshul gyis slob ma de nyid legs par gnas dgos pa ste | brgyad stong pa las kyang | gal te chos sra ba dag chos 'dod pa dag la brnyes shing mi sems pa ltar na'ang de la khyod kyis phyir bsdo bar mi bya ste lhag par yang chos don du gnyer ba dang gus shing mi skyo bas de'i phyi bzhin 'brang bar bya'o | | zhes gsungs pas so | |
gzhan yang bla ma'i bya ba la ji ltar zhugs kyang 'gro zhing 'ong bas mi skyo ba gru lta bu'i sems slob mas bskyed dgos par yang rje bdag nyid chen po sogs skyes chen du ma'i zhal mthun du bka' phebs nges par byung ba sogs spyi'i tshul de 'dra lags la | de lta bu'i bla ma dge ba'i bshes gnyen slob dpon de nyid la slob tshogs gang dag gis bsam pa dang sbyor ba yang dag pa'i sgo nas ji ltar bsten pa sgos kyi tshul la thog mar bsam pa'i rtsa ba ni bla ma'i mos gus nyid yin la | de'i yan lag tu bla ma'i sku gsung thugs kyi skyon la mi brtag ste | gal te skyon gyi rnam pa mthong na'ang slob ma rang gis blo sbyong tshul 'di lta bya dgos te | rtsa ba'i bla ma mchog la 'di lta bu'i skyon dang mdzad spyod ga la mnga' | 'di ni bdag rang gi sems ma dag pas lan mkhris nad can gyis dung ser bor mthong ba dang 'dra | sngon gyi