[A:568] ba dang | nyin gcig seng ldeng gi tshal pa sor bzhi pa zhig zhabs la zug pa dang | gdud kyi sgyogs rdo 'phangs pas zhabs g.yas pa'i mthe bong la phyog pas khrag 'o ma'i rgyun ltar babs pa'i tshul bstan pa dang | yang las kyi rnams par smin pa rang gis myong nges rnams gzhan la bsgyur du mi btub pa ston pa'i ched du | kun tu rgyu gnas ma'i bu sangs rgyas rgyas kyi sku mdun du bsad pa la | sangs rgyas kyis ma bskyabs par btang snyoms su bzhag pa dang | yang phyi rabs gang zag rnams la sdug bsngal byung na yid mi sun par bya ba'i ched du | mu stegs grags pas shing gi gzhong bu gos rum du bcug nas kho ma'i lus ni dge sbyong go'u ta mas sbrum mar byas so zhes skur ba btab pa dang | grong khyer bal can du bsod snyoms la phyin pas | 'bras zeg pa gcig kyang ma rnyed par lhung bzed stong par log pa dang | mtha' 'khob kyi grong khyer la phyin dus | bsod snyoms ma 'byor bar | tshong pa'i rta chas sran ma rul ba bzhes dgos pa'i tshul bstan pa dang | yang ngal zhing dub pa'i mtha' spang ba'i ched du sku rgyab bsnyung nas sman pa'i rgyal po 'tsho byed las | sman ur pa la ha ta ghan dha blangs pa dang | sku na bgres te lo drug cu rtsa gcig lon pa dang nga la nye gnas cig dgos gsungs pa lta bu'i thabs tshul sna tshogs pa'i sgo du ma ston pa mchog nyid kyis legs gnang gi mdzad pa la yang yang bsam par bya dgos shing | de 'dra'i dag snang gi thabs bya ba'i tshul sngon gyi dam pa gong ma 'ga'i zhal snga nas | 'di lta ste | mtshan ldan bla ma rin po chen 'dis | | gang mdzad thams cad legs pa yin | | ci mdzad thams cad yon tan yin | | mi gsod bshan pa mdzad na yang | | de khas 'tshengs shing de kha legs | | sems can thugs rjes 'dzin par nges | | log g.yem 'chal ba'i tshul ston yang | | yon tan 'phel zhing yon tan 'byung | | thabs shes zung du 'jug pa'i brda | | rdzun gyis gzhan mgo bskor ba na | | brda thabs rnam pa sna tshogs kyis | | 'gro kun thar pa'i lam la 'dren | | rku 'phrog chom po mdzad na yang | | gzhan gyi yo byad tshogs su bsgyur | | skye bo phongs pa zhi ba yin | | don la 'di 'dra'i bla ma yin | | bka' bkyon mdzad na drag sngags yin | | rkyen ngan bar chad sel bar nges | | brdung brdeg mdzad na byin rlabs yin | | dngos grub thams cad de las 'byung | | mos gus can tsho nyams re dga' | | zhes gsungs pa ltar rang re'i bla ma rje btsun kun dga' grol mchog gis kyang gsungs pa'ang | dngos grub kyi rtsa ba de bla ma skad | | bla ma de sangs rgyas dngos byon skad | | ci mdzad de lugs par blta dgos skad | | mdzes mdzes su smra yang sgra skad lags | | dngos grub la thob rung ma thob rung | | sangs rgyas dang sems can gang yin yang | | mdzad pa yang legs nyes ci ston rung | | mi nga la snyoms khrigs rdul tsam med | | ces pa ltar ro | |
gzhan yang mos gus bya lugs 'di ltar bsam la | rang la bka' drin gsum ldan gyi bla ma mchog 'di nyid don dngos po'i gnas tshod kyi dbang du byas na sangs rgyas byang sems kyi sprul pa yin pa'ang srid | ma yin tha mal ba yin du chug kyang | rdo rje slob dpon de'i sku gsung thugs la yi dam gyi lha rnams rjes su zhugs pa'i tshul