[A:572] gus pas bla ma la bsten pa dang bsnyen pa dang bsnyen bkur bya'o | | de ltar na dge ba'i chos thos pas bsam pa dge ba dang de las sbyor ba dge bar 'gyur ro | | des dge ba'i las byed cing dge bar 'gro bas dge ba'i grogs mgu bar byed do | | de las sdig pa'i las mi byed cing dge ba byed pas bdag dang gzhan la gdung bar mi byed do | | bdag dang gzhan rjes su bsrung bas ni bla na med pa'i byang chub kyi lam rdzogs par byed pas lam ngan par zhugs pa'i sems can rnams kyi don byed par nus so | | de nas byang chub sems dpas bla ma la bsten yon tan gyi tshogs thams cad rdzogs par bya'o | | zhes gsungs so | |
gzhan yang bshes gnyen bkur bas ni | ngan 'gro myong ba'i las rnams tshe 'di la lus sems la gnod pa phra mo tsam mam | rmi lam du myong bas kyang las de rtsa ba drungs nas zad par 'gyur ba dang | sangs rgyas dpag tu med pa la yon phul ba sogs kyi dge rtsa rnams zil gyis gnon pa sogs kyi phan yon shin tu che ste | sa'i snying po'i mdo las | des zin pa ni bskal pa bye ba dpag tu med par ngan 'gror 'khyams par 'gyur ba'i las rnams tshe 'dir rims la sogs pa'am mu ge la sogs pa lus dang sems la gnod pa byung bas byang bar 'gyur te tha na brgyad bkag gam rmi lam tsam gyis kyang byang bar 'gyur ro | | des sangs rgyas bye ba dpag tu med pa la dge ba'i rtsa ba bskyed pa sbyin pa'am mchod pa'am bslab pa bzung ba las byung ba rnams snga dro gcig gis zil gyis gnon no | | bla ma la bsnyen bkur byed pa ni yon tan bsam gyis mi khyab pa dang ldan pa'o | | zhes dang | sangs rgyas kyi yon tan rnam par 'phrul ba dpag tu med pa thams cad kyang 'di las byung bar blta'o | | des na sangs rgyas la bya ba ltar bla ma bsten pa dang bsnyen pa dang bsnyen bkur bya'o | | zhes gsungs pa'i phyir ro | |
skyes rabs las kyang | dam pa rnams ni sus kyang mi bsrings ste | | dul ba'i tshul gyis dge ba bsten par bya | | de dang nye na de yi yon tan rdul | | ched du ma bsgos par yang gos par 'gyur | | zhes pa la sogs pa phar phyin theg pa'i sde snod du de 'dra ches mang po gsungs shing | gsang sngags kyi sde snod dag las kyang tshul de dang mthun par rdo rje theg pa'i chos tshul 'doms pa'i bla ma rdo rje 'dzin pa slob dpon chen po gang nyid rdo rje'i slob bu rnams kyis gus pa'i sgo nas legs bsten gyi phan yon yang gsang chen bla med kyi gnas lugs rang byung ye nas bzhugs pa'i don dam bde stong lhan cig skyes pa'i ye shes kyi rang mdangs kyi cha rim pas ji bzhin mngon byed kyi thabs khyad par ba ni bla ma rdo rje slob dpon kho na'i bka' drin las gzhan pas rnyed thabs gang nas bral zhing de yang bla ma dang slob ma zung phan tshun mtshan nyid legs par tshang zhing bla mas gdams ngag bstan pa dang slob mas tshul bzhin nyams su blangs pa kho na'i bsod nams kyi yed pa las nges par 'byung dgos tshul dang bcas dgyes